CM Pramod Sawant मतदारसंघातील सर्व पंचायतींमध्ये मुख्यमंत्री डॉ. प्रमोद सावंत यांनी भेट देऊन सरपंच, उपसरपंच, पंच सदस्यांशी संवाद साधला. सर्व पंचायतींकडून मान्सूनपूर्व कामांचा आढावा त्यांनी घेत विविध सूचना केल्या.

पावसाळ्यात सामान्य लोकांना कोणत्याही प्रकारचा त्रास होऊ नये याची काळजी घ्या, असे मुख्यमंत्र्यांनी सर्व पंचायतींना सांगितले.

साखळी मतदारसंघातील कुडणे, न्हावेली, आमोणा, सुर्ल, पाळी कोठंबी, वेळगे व हरवळे या सातही पंचायतींना सकाळच्या सत्रात मुख्यमंत्र्यांनी धावती भेट दिली. या भेटीत गावातील विविध समस्या, मान्सूनपूर्व कामांची तयारी, वीज, पाणी समस्या इत्यादी विविध विषयांवर पंचायत मंडळ सदस्यांशी चर्चा केली.

तसेच गावातील भेटायला आलेल्या नागरिकांच्या समस्या ऐकून घेतल्या. सर्व पंचायतींना मुख्यमंत्री डॉ. प्रमोद सावंत यांनी विविध विषयांवर मार्गदर्शन केले.

यावेळी जिल्हा पंचायत सदस्य गोपाळ सुर्लकर, पाळीचे सरपंच शिवदास मुळगावकर, वेळगेचे सरपंच सामंता कामत, सुर्लाच्या सरपंच विश्रांती सुर्लकर, कुडणेचे सरपंच राजेंद्र फाळकर, न्हावेलीचे सरपंच कालिदास गावस, आमोण्याचे सरपंच कृष्णा गावस, हरवळेचे सरपंच राजू मळीक यांच्यासह पंचायत सदस्य उपस्थित होते.

साखळीतील सातही पंचायतींना भेटी

साखळी मतदारसंघातील सर्व सातही पंचायतींमध्ये भेटी देऊन पावसासाठी तयार राहण्याचे मुख्यमंत्र्यांनी आवाहन केले. सरकारी पातळीवर जर कोणत्याही प्रकारचे काम असल्यास तत्काळ आपणास कळवावे.

ते लवकरात लवकर करून दिले जाईल. सामान्य लोकांना पावसात समस्या होऊ नये यासाठी लक्ष द्या असे सर्व पंचायतींना आपण सांगितले आहे, असे मुख्यमंत्री डॉ. प्रमोद सावंत यांनी सांगितले.

पालकांना सुरक्षिततेचे आवाहन

सोमवारपासून शैक्षणिक वर्षाला प्रारंभ होत असून पोलिस व वाहतूक पोलिस यांना सतर्क राहण्याची सूचना मुख्यमंत्र्यांनी केली आहे. पालकांनीही मुलांची ने - आण करताना सुरक्षा बाळगावी व पोलिसांना सहकार्य करावे, असेही आवाहन मुख्यमंत्र्यांनी केले.