दाबोळी येथील 14 वर्षीय मुलीच्या अपहरण प्रकरणी वास्को पोलिसांनी महम्मद जाफर कादरी (23) या मूळ उत्तर प्रदेशातील एकाला अटक केली आहे. आरोपीला वास्को पोलिसांच्या पथकाने नवी मुंबई येथून अटक केली असून, गुन्हा केल्यानंतर तो फरार होता. पोलिसांनी आरोपीच्या ताब्यातून पीडितेची सुटका केली आहे.

वास्को पोलीस स्थानकाचे निरीक्षक कपील नायक यांनी दिलेल्या माहीतीनुसार, ३० मे रोजी अल्पवयीन मुलगी गायब असून तिचे अपहरण झाल्याची तक्रार दाखल करण्यात आली होती. त्यानुसार पोलीस संशयिताच्या मागावर होते.पोलिसांना संशयित मुंबईत असल्याची माहिती मिळाली. दाबोळी येथे राहणारा महम्मद जाफर कादरी (मूळ उत्तरप्रदेश) हा तरुण तिला घेऊन नवी मुंबई असल्याचे समोर आले.

त्यानुसार वास्को पोलिसांचे पथक नवी मुंबई येथे पाठवण्यात आले. स्थानिक पोलीस उपनिरीक्षक रोहन नागेशकर, हेडकॉन्स्टेबल संतोष भाटकर यांच्या मदतीने वास्को पोलिसांनी महम्मदचा शोध लावून त्याच्या मुसक्या आवळल्या. अल्पवयीन मुलीची सुटका करून तिला गोव्यात आणून कुटूंबाच्या ताब्यात दिले आहे.