गोव्यातील मुस्लिम बांधव पाकिस्तानच्या क्रिकेट टीमला पाठिंबा देत असल्याचा एक व्हिडिओ काही दिवसांपूर्वी समोर आला होता. यात एक पर्यटक व्हिडिओ ब्लॉगिंग (Video Blogging) करताना दिसत असून, हॉटेलमध्ये बसलेल्या लोकांना तो तुम्ही कोणत्या टीमला पाठींबा देताय असे विचारतो, त्यावर ते लोक 'पाकिस्तान' असे उत्तर देतात. हा व्हिडिओ सोशल मीडियावर व्हायरल झाल्यावर गोमंतकियांमधून तीव्र प्रतिक्रिया उमटल्या होत्या.

दरम्यान या विषयाशी संबंधित एक मोठी update हाती येतेय. ज्याने पाकिस्तान क्रिकेट संघाला पाठिंबा दर्शवला होता, त्या हॉटेल मालकाला कळंगुट परिसरात सार्वजनिकपणे माफी मागायला लावल्याचा व्हिडिओ सोशल मीडियावर व्हायरल होतोय. त्या व्हिडिओमध्ये संबंधित व्यक्तीला जमिनीवर गुडघे टेकण्यास आणि कान धरण्यास सांगितले जातेय. तसेच देशाप्रती त्यांची निष्ठा सिद्ध करण्यासाठी त्यांना ‘भारत माता की जय’ म्हणायला लावले जात आहे.

YouTube व्हिडिओ 26 नोव्हेंबर 2022 रोजी अपलोड करण्यात आला होता. व्लॉगरने क्लिप ट्विट केली ज्यामध्ये त्या व्यक्तीने 22 फेब्रुवारी 2023 रोजी पाकिस्तानला पाठिंबा व्यक्त केला होता, त्यानंतर तो व्हायरल झाला. हा व्हिडिओ व्हायरल झाल्यानंतर हॉटेल मालकाला त्याच्या कर्मचाऱ्यांसह गुडघे टेकून माफी मागावी लागली.