Goa Fire News : राज्यात आगीच्या घटना वाढतच असून गत 48 तासांत राज्यभरात 10 आगीच्या घटनांची नोंद झाली. मडगावमध्ये गुरुवारी आठ ठिकाणी तर आज पेडणेतील भोम-देवसूत काजू बागायतीला आग लागून सुमारे 200 वृक्ष जळून खाक झाले. तसेच सांताक्रुझ येथील पोर्तुगीजकालीन बंद घराला आग लागून लाखो रुपयांचे नुकसान झाले.

गुरुवारी 1) नवावाडो-सेर्नभाटी, कोलवा येथील रोमिओ कॉटेजजवळ, 2) कुडतरी येथील सेंट अँथोनी चॅपेलजवळ, 3) र्मोणा येथील पोस्ट ऑफिसजवळ, 4) दवरली पंचायतीजवळ, 5) कुडतरी माकझाना, चंद्रवाडो-फातोर्डा या सर्व ठिकाणी सुक्या गवताला आग लागली.

यावेळी अग्निशमक दलाने मदतकार्य करून लाखोंची मालमत्ता वाचविली. तर सेरावली मडगाव येथे पेट्रोल पंपाजवळ एका वडाचे झाड जळाले. दवर्ली येथील मारुती मंदिर हाऊसिंग बोर्डजवळ दुचाकीसह नरकासुराच्या फ्रेमला आग लागली. या घटनांमुळे अग्निशमन दलाची चांगलीच धावपळ झाली.