Sonali Phogat Case : भाजप नेत्या तथा अभिनेत्री सोनाली फोगट यांच्या मृत्युप्रकरणी गोवा पोलिसांनी ज्या वागातोर येथील ग्रॅण्ड लिओनी रिसॉर्टकडे दुर्लक्ष केले होते, तेथेच शनिवारी सीबीआयने पहिली धडक देत दिवसभर अनेक बाबींची तपासणी केली. याच हॉटेलमध्ये सोनाली यांना पहिल्यांदा ड्रग्स देण्यात आले होते. शिवाय ड्रग्सपुरवठा करणारे दोन्ही संशयित याच हॉटेलमध्ये काम करत होते. हाच धागा पकडून आज सीबीआयच्या पथकाने तेथे चौकशी आणि तपास केला.

सीबीआयचे पथक सध्या गोव्यात आले असून, शनिवारी (17 सप्टेंबर) सकाळी 11.45 च्या सुमारास सीबीआयची टीम सोनाली फोगट या उतरलेल्या वागातोर येथील ग्रॅण्ड लिओनी रिसॉर्टवर दाखल झाली. यावेळी हणजूण पोलिसांनी माध्यम प्रतिनिधींना रिसॉर्टच्या गेटबाहेरच रोखले.

‘कर्लिस’चीही चौकशी

यावेळी सीबीआयच्या अधिकाऱ्यांनी रिसॉर्टच्या परिसराची पाहणी केली. तसेच अधिकाऱ्यांकडून रिसॉर्टची एण्ट्री व एक्झिट पाँईट तसेच रस्त्याचे छायाचित्र व व्हिडिओ घेतले. सीबीआय पथकाकडून कर्लिस रेस्टॉरंटचीही पाहणी होईल, असे सूत्रांनी सांगितले.

गोवा पोलिसांकडून रिसॉर्ट दुर्लक्षित

सोनाली यांच्या मृत्यूनंतर पहिल्यांदाच सीबीआयकडून या रिसॉर्टची इतकी तपशीलवार तपासणी झाली. यापूर्वी गोवा पोलिसांचा फक्त कर्लिस रेस्टॉरंटच तपासणीचा केंद्रबिंदू होता. सोनाली फोगट या गोव्यात दाखल होताच त्या या ग्रॅण्ड लिओनी रिसॉर्टवर वास्तव्यास होत्या.