सुशोभिकरण करुन नवीन साज चढवण्यात आलेल्या तार-म्हापसा येथील जंक्शनचा परिसर यापुढे ‘सर्कल ऑफ जॉय’ या नावाने ओळखला जाणार आहे.

दिवाळीच्या पूर्वसंध्येला म्हणजे, ११ नोव्हेंबर रोजी माजी आमदार ग्लेन टिकलो, बस्तोडा पंचायतीचे सरपंच सुभाष मोरजकर तसेच इतर पंचसदस्यांच्या उपस्थितीत नूतनीकरण केलेल्या या सर्कलचे उद्घाटन होणार आहे. माजी सरपंच सावियो मार्टीन्स यांनी याविषयी माहिती दिली.

जंक्शनच्या परिसराच्या सुशोभीकरणाच्या कामाला गेल्या वर्षी सुरवात झालेली. सर्कलवर दुभाजकसह वाहतूक बेट, फुटपाथ उभारली या कामासाठी सुमारे ३० लाख रुपये खर्च करण्यात आलाय. सदर काम सीएसआर योजनेअंतर्गत करण्यात आल्याची माहिती मार्टीन्स यांनी दिली.

वाहतूक बेटावर पारंपरिक खेळांचे दर्शन घडवणारे लहान मुलांचे पुतळे बसवण्यात आले आहेत. सीसीटीव्ही कॅमेर्‍यांसोबत व्हायफाय सुविधा उपलब्ध करुन देण्यात आली आहे. याचे नियंत्रण पंचायत कार्यालयात असणार आहे. त्याचबरोबर रस्त्याची डागडुजी हाती घेतली जाणार आहे. या सर्व कामांना रितसर परवानगी घेऊन घेतल्याचे मार्टीन्स म्हणाले.