All India Badminton Ranking: गोव्याची आंतरराष्ट्रीय बॅडमिंटनपटू तनिशा क्रास्टो हिने हरियानात झालेल्या अखिल भारतीय सीनियर मानांकन बॅडमिंटन स्पर्धेत दुहेरी विजेतेपदास गवसणी घातली. महिला दुहेरी व मिश्र दुहेरीत तिने बाजी मारली.

तनिशाना महिला दुहेरीत अश्विनी पोनाप्पा हिच्यासह, तर मिश्र दुहेरीत के. साई प्रतीक याच्या साथीत विजेतेपद प्राप्त केले. अंतिम लढतीत तनिशा व अश्विनी जोडीने राधिका शर्मा व तन्वी शर्मा जोडीस २१-१३, २१-१४ असे पराजित केले. मिश्र दुहेरीत तनिशा व साई प्रतीकने हरिहरन अम्साकरुणन व व्ही. एस. वर्षिनी जोडीस २१-१९, २१-१३ असे हरविले.

या स्पर्धेत गोव्याची आणखी एक महिला खेळाडू अनुरा प्रभुदेसाई दुहेरीत सहभागी झाली होती. अनुरा व रिया मुखर्जी जोडीस उपांत्यपूर्व फेरीत माघार घ्यावी लागली. राधिका शर्मा-तन्वी शर्मा जोडीने त्यांना २१-१८, १८-२१, २१-१७ असे नमविले.

लक्षणीय कामगिरी

अखिल भारतीय सीनियर मानांकन बॅडमिंटन स्पर्धेत दुहेरी किताब पटकावलेल्या तनिशाचे गोवा बॅडमिंटन असोसिएशनने अभिनंदन केले आहे. तनिशाचा मिश्र दुहेरीतील नियमित सहकारी ईशान भटनागर याला दुखापत झाली, त्यामुळे या जोडीस पुण्यात झालेल्या राष्ट्रीय सीनियर स्पर्धेस मुकावे लागले. मात्र आता तनिशाने जोरदार मुसंडी मारली, ही बाब आश्वासक आहे.

आगामी आशियाई क्रीडा स्पर्धा आणि सुदिरमन कप स्पर्धेच्या पार्श्वभूमीवर तनिशाने सहकारी खेळाडूंसह बजावलेली कामगिरी लक्षणीय आहे. या कामगिरीचे मानांकन गुण भारतीय संघ निवड चाचणीत महत्त्वपूर्ण ठरतील, असे गोवा बॅडमिंटन संघटनेचे सचिव संदीप हेबळे यांनी सांगितले. त्यांनी तनिशाचे कौतुक करताना तिचा मिश्र दुहेरीतील सहकारी ईशान लवकर तंदुरुस्त होण्याचा विश्वास प्रकट केला.

"हरियानातील अखिल भारतीय बॅडमिंटन मानांकन स्पर्धेतील विलक्षण कामगिरीबद्दल गोव्याची भारतीय स्टार खेळाडू तनिशा क्रास्टो हिचे अभिनंदन. दुहेरी आणि मिश्र दुहेरी विजेतेपद ही उल्लेखनीय उपलब्धी आहे." अशा शब्दात मुख्यमंत्री डॉ. प्रमोद सावंत यांनी शुभेच्छा दिल्या आहेत.