पणजी: व्हडलेभाट - ताळगाव येथील १६ वर्षीय मुलीचे अपरहण करून पलायन केलेल्या बिपलाब दास याला पणजी पोलिसांनी त्रिपुरा येथे मुलीसह ताब्यात घेतले.

संशयित दास याच्या ट्रान्झिट वॉरंटसाठी अर्ज केला असता त्याला त्रिपुरा न्यायालयाने जामीन दिला. त्याच्याविरुद्ध अपहरणासह पोक्सो कायद्याखाली गुन्हा दाखल केला जाणार असून पुन्हा अटक केली जाणार असल्याची माहिती पणजी पोलिसांनी दिली. पीडित मुलीचे कुटुंब व संशयित दास हे शेजारी आहेत. दास याच्यावर मुलीच्या कुटुंबीयांनी संशय व्यक्त केला होता.

दास हा मूळचा त्रिपुरा येथील असल्याने पोलिसांनी त्रिपुरा पोलिसांशी संपर्क साधला. मात्र, तो त्रिपुरा येथे पोहचला नसल्याची माहिती मिळाली. त्यामुळे पोलिस उपनिरीक्षक सपना गावस यांनी कुटुंबीयांसह त्रिपुरा गाठले. स्थानिक पोलिसांच्या मदतीने दास याच्या घरी पोचले असता मुलगी त्याच्यासोबत सापडली.

मुलीला ताब्यात घेऊन पालकांच्या स्वाधीन केले असून संशयिताला अटक करून गोव्यात आणण्यासाठी न्यायालयात ट्रान्झिट वॉरंट घेण्यासाठी अर्ज करण्यात आला. त्याचवेळी संशयिताच्या वतीने जामिनासाठी अर्ज केला असता, तो मान्य करण्यात आला. त्याला पुढील आठवड्यात पणजी पोलिस स्थानकात हजेरी लावण्यास सांगितले आहे. लैंगिक अत्याचार केल्याप्रकरणी त्याच्याविरुद्ध गुन्हा दाखल केला आहे.