खुरसावाडो-दिवाडी (Khursawado-Divar) येथे अज्ञातांकडून छत्रपती शिवाजी महाराजांच्या (Chhatrapati Shivaji Maharaj) पुतळ्याच्या तलवारीची नासधूस करण्यात आली आहे. शुक्रवारी (दि.16) रात्रीच्या सुमारास ही घटना घडली. यावरून परिसरात तणावाचे वातावरण आहे.

मिळालेल्या माहितीनुसार, खुरसावाडो-दिवाडी येथे छत्रपती शिवाजी महाराजांच्या पुतळ्याला दररोज आरती लावली जाते. शुक्रवारी रात्री आठ वाजता एक व्यक्ती आरती लावण्यासाठी गेला असता हा प्रकार उघडकीस आला. या व्यक्तीने छत्रपती शिवाजी महाराजांच्या पुतळ्याच्या तलवारीची नासधूस झाल्याचे सांगितले. यावरून परिसरात काहीवेळ तणावाचे वातावरण पाहायला मिळाले. त्यानंतर गावकऱ्यांनी ओल्ड गोवा (Old Goa) पोलिस ठाण्यात धाव घेऊन अज्ञाताविरोधात गुन्हा दाखल केला आहे. पोलिसांनी देखील याप्रकरणी दखल घेतली असून, घटनास्थळी जाऊन पुतळ्याची पाहणी केली. दरम्यान, घटनास्थळी पोलिस बंदोबस्त तैनात करण्यात आला आहे.

काही दिवसांपूर्वी साखळीत देखील एका परप्रांतीय मुस्लिम तरूणाने छत्रपती शिवाजी महाराजांच्या पुतळ्यासमोर हिरवा झेंडा फडकावून सामाजिक तेढ निर्माण करण्याचा प्रयत्न केला होता. मुस्लिम समाजाची धार्मिक फेरी जात असताना हा प्रकार घडला होता. ग्रामस्थांनी आणि शिवप्रेमींनी या माथेफिरू तरूणाला गाठून महाराजाच्या पुतळ्यासमोर नाक रगडून माफी मागायला भाग पाडले होते.