गोवा: भारताच्या टी-20 क्रिकेट संघाचा कर्णधार सूर्यकुमार यादव गोव्यात पोहोचला असून त्याचे दाबोळी विमानतळावर मंत्री माविन गुदिन्हो यांनी स्वागत केले. यावेळी क्रिकेटप्रेमी, स्थानिक राजकीय नेते आणि अधिकारी यांची उपस्थिती पाहायला मिळाली.

दरम्यान, मुरगावमधील चिखलीचे सरपंच कमलाप्रसाद यादव यांच्या देखरेखीखाली तयार करण्यात आलेले भव्य स्वरुपाचे ‘१९१९ स्पोर्टस’ क्रिकेट मैदान लवकरच क्रिकेटच्या सेवेसाठी खुलं होणार आहे. हे मैदान पाच हजार आसनक्षमतेचे असून, वर्ना औद्योगिक वसाहतीतील लोटली पंचायत क्षेत्रात साकारले गेले आहे.

या नव्या क्रिकेट मैदानाचे लोकार्पण मुख्यमंत्री डॉ. प्रमोद सावंत आणि टी-20 कर्णधार सूर्यकुमार यादव यांच्या उपस्थितीत करण्यात येणार आहे. लोकार्पण समारंभामध्ये स्थानिक खेळाडू, युवा संघटनांचे प्रतिनिधी आणि क्रिकेट संघाचे अधिकारीही सहभागी होणार आहेत.

‘१९१९ स्पोर्टस’ मैदानाला आधुनिक सुविधा असतील आणि ते गोव्यातील क्रिकेट खेळासाठी एक महत्त्वाचे केंद्र बनेल. या मैदानाच्या माध्यमातून स्थानिक तरुणांना राष्ट्रीय आणि आंतरराष्ट्रीय स्तरावर क्रिकेट खेळण्याची संधी मिळेल.

वेर्णा औद्योगिक वसाहतीत राष्ट्रीय महामार्गापासून काही अंतरावर ‘१९१९ स्पोर्टस’ हे आंतरराष्ट्रीय दर्जाचे क्रिकेट मैदान साकरले आहे. ७९ यार्ड जागेत या मैदानाचे बांधकाम करण्यात आले आहे. मैदानावर एकूण नऊ खेळपट्ट्या आहेत, तसेच दिन-रात्र सामने खेळविण्यासाठी प्रकाशझोत व्यवस्थाही आहे.