पणजी: गोव्याच्या संरक्षित जंगलांतील आणि जैवविविधतेने समृद्ध असलेल्या पठारांवरील विनाशकारी प्रकल्पांविरोधात पर्यावरणतज्ज्ञ, स्थानिक लोकप्रतिनिधी आणि सामाजिक कार्यकर्ते एकवटले आहेत. सुर्ला प्रकल्प ताबडतोब रद्द करा आणि गोव्‍याचे पर्यावरण वाचवा, अशी मागणी त्‍यांनी मुख्‍यमंत्री व पंतप्रधानांकडे केली आहे.

यानिमित्ताने येथे आयोजित पत्रकार परिषदेला ‘गोवा फाऊंडेशन’चे निमंत्रक डॉ. क्‍लॉड आल्‍वारीस, पर्यावरणतज्ज्ञ राजेंद्र केरकर, कालेचे सरपंच नरेंद्र गावकर, उपसरपंच सांगवी नाईक, पंचसदस्य बाळू रेकडो आणि गंगाधर गावकर उपस्थित होते. दरम्यान, ‘आमचे मोले’ गटाने गोव्यातील पठारे जोपासावीत अशी मागणी केली.

क्‍लॉड आल्‍वारीस यांनी पंतप्रधान नरेंद्र मोदी यांना सादर केलेल्या निवेदनाचा तपशील मांडला. त्‍यात भगवान महावीर राष्ट्रीय उद्यान, म्हादई अभयारण्य तसेच इतर संरक्षित क्षेत्रांतील विकासप्रकल्पांना तीव्र आक्षेप घेण्‍यात आला आहे. राजेंद्र केरकर यांनी सांगितले की, गोव्यातील पठारांवरील जागा उपयोगी नाही असे म्हणून दुर्लक्षित केली जात आहेत.

प्रत्यक्षात ही पठारे अनेक दुर्मीळ वनस्पतींचे घरे आहेत. संशोधनानुसार ४० टक्के हर्बसीयस वनस्पती तेथे आहेत. सुर्ला पठारावरील प्रस्तावित पर्यटन प्रकल्पामुळे पाण्याचा प्रवाह, जैविक सूक्ष्म अधिवास आणि पर्यावरणीय समतोल धोक्यात येणार आहे.

सुर्लाचे पठार बिबट्या, गवा, अस्वलांसाठी महत्त्वपूर्ण

कर्नाटकातून आणलेला खनिज साठा काले गावातील संरक्षित अभयारण्याच्या हद्दीत टाकण्‍यास गोवा सरकारने परवानगी देण्यात आली आहे. यापूर्वी उच्च न्यायालयाने यावर बंदी घातली होती. सुर्ला (म्हादई अभयारण्य) येथील ८ कोटींचा आलिशान प्रकल्प प्रस्तावित व्याघ्र प्रकल्पाच्या मुख्य झोनमध्ये आहे. बिबट्या, गवा व अस्वलांसाठी हे ठिकाण अत्यंत महत्त्वपूर्ण आहे. प्रकल्पासाठी इलेक्ट्रिक कुंपण घालण्याचा प्रस्ताव हा अभयारण्य नियमांचा थेट भंग असल्याची टीका पर्यावरणतज्ज्ञांनी केली.