म्हापसा: कोलवाळ मध्यवर्ती कारागृहातील अटक केलेल्या जेलगार्ड सूरज गावडे याला ड्रग्सचा पुरवठा करणारा ड्रग पेडलर योगेश पागी (24, काणकोण) याला कोलवाळ पोलिसांनी आगोंद-काणकोण येथून अटक केली.

दोन दिवसांपूर्वी जेलगार्ड सूरज गावडे याला कारागृहाच्या गेटवर आरबीआयच्या पोलिसांनी कोकेनसह रंगेहाथ पकडले होते. हे ड्रग्स गावडे याला संशयित योगेश पागी यानेच पुरवले होते, हे तपासावेळी समजल्यावर कोलवाळ पोलिसांनी योगेश पागी याला शुक्रवारी सायंकाळी उशिरा आगोंदमधून ताब्यात घेतले.

(Goa Drug Case)

हे ड्रग्स मूळ ठिकाणाहून कारागृहापर्यंत पोहचवण्यात आणखी काहीजणांचा समावेश असून, त्या अनुषंगाने पोलिस तपास करत आहेत. विश्वसनीय सूत्रांकडून मिळालेली माहिती तसेच तांत्रिक विश्लेषणानुसार कोलवाळ पोलिसांतर्फे उपनिरीक्षक कुणाल नाईक, हेड कॉन्स्टेबल सुधीर परब, कॉन्स्टेबल सुलेश नाईक, आयआरबीचे हेड कॉन्स्टेबल विशांत मांद्रेकर यांनी काणकोणमध्ये जाऊन ड्रग पेडलर योगेश पागी याला ताब्यात घेतले.

मोबाईलवरून योगेशशी संवाद

कोलवाळ कारागृहातील अंडर ट्रायल कैदी विकट भगत याने मोबाईलवरून ड्रग पेडलर संशयित योगेश पागी याच्याशी संपर्क साधला आणि जेलगार्ड सूरज गावडे याच्याकडे कोकेन (4 ग्रॅम) देण्यास सांगितले. त्यानुसार पागी याने तो जेलगार्डला पुरवला. भगतला मोबाईलही कसा मिळाला, हाही प्रश्‍न अनुत्तरित आहे. भगत याच्यावर काणकोण पोलिस स्थानकात एकूण 14 गुन्हे नोंद असून, यात खुनाचाही एक गुन्हा आहे.