केपे: मोरायले-कुडचडे येथील सनी फर्नांडिस (वय ४० वर्षे) या तरुणाने शनिवारी दुपारी १२ वाजता सावर्डे येथील जुन्या झुआरी पुलावरून नदीत उडी मारून आत्महत्या केल्याची धक्कादायक घटना समोर आली आहे. या घटनेमुळे त्याच्या कुटुंबीयांना जबरदस्त धक्का बसला असून कुडचडे अग्निशामक दलाने शोध मोहीम हाती घेतली आहे.

शनिवारी दुपारी १२ वाजता सनी हा सावर्डे येथील जुन्या झुआरी पुलावर बसून असल्याचे काहीजणांनी पाहिले होते. सनीने अचानक नदीत उडी मारल्याचे यावेळी काही लोकांनी पाहिले आणि याची माहिती कुडचडे पोलिस तसेच अग्निशामक दलाला दिली. सनीचा शोध घेण्यासाठी रात्री उशिरापर्यंत मोहीम सुरू होती.

वाचविण्यासाठी हात दाखविला पण...

सनी फर्नांडिस याने नदीत उडी मारल्यानंतर स्वत:ला वाचविण्यासाठी तो पाण्याबाहेर हात दाखवत होता, असे त्याठिकाणी उपस्थित असलेल्या लोकांनी सांगितले. या घटनेची माहिती मिळताच कुडचडे पोलिस व अग्निशामक दलाच्या जवानांनी घटनास्थळी धाव घेतली आणि शोध मोहिमेला सुरुवात केली.