Goa Forward Party: आंतरराष्ट्रीय महिलादिनीच भाजप महिला मोर्चाच्या नेत्या सुलक्षणा सावंत यांनी केंद्र सरकारने केलेल्या गॅस सिलिंडर दरवाढीचे समर्थन केले

. त्‍यांच्‍या वक्तव्‍याचा आम्‍ही निषेध करतो, असे गोवा फॉरवर्डच्‍या उपाध्यक्ष अॅड. अश्‍मा सय्यद यानी आज मडगावात घेतलेल्या पत्रकार परिषदेत सांगितले. सावंत यांनी अभ्यास करूनच बोलावे किंवा तोंड तरी बंद ठेवावे, असा सल्लाही त्‍यांनी दिला.

आंतरराष्ट्रीय बाजारात दर वाढल्यामुळे केंद्र सरकारला गॅसदरवाढ करणे भाग पडले असे सावंत सांगतात. पण सप्टेंबर 2022 मध्ये आंतरराष्ट्रीय बाजारात गॅसचा दर 9 डॉलर होता. या मार्चमध्ये तो 3 डॉलरवर आला आहे.

किंमत कमी झालेली असताना केंद्र सरकार दरवाढ असे काय करू शकते? साखळी येथे लोक आता स्‍वयंपाक बनविण्‍यासाठी गॅसऐवजी चुलीचा वापर करू लागले आहेत. हे कशाचे द्योतक आहे?, असा सवालही त्‍यांनी विचारला.

आंतरराष्ट्रीय पातळीवर क्रुड तेलाच्या दरात वाढ झाली असेल तर मुख्यमंत्री प्रमोद सावंत कसे काय खासगी विमानाने प्रवास करतात? वाढत्‍या महागाईवर सरकारने तोडगा काढणे आवश्यक आहे, अन्‍यथा एक दिवस जनता रस्‍त्‍यावर उतरल्‍याशिवाय राहणार नाही, असा इशारा नगरसेविका निमेसिया फालेरो यांनी दिला.

दरम्‍यान, या पत्रकार परिषदेला माजी नगराध्यक्ष व विद्यमान नगरसेविका पूजा नाईक यांचीही उपस्थिती होती.