डिचोली: मुख्यमंत्री डॉ. प्रमोद सावंत यांच्या पत्नी सुलक्षणा सावंत यांच्या विरोधात वक्तव्य करण्यास दिल्लीचे खासदार आणि आप नेते संजय सिंह यांना न्यायालयाने मज्जाव केला आहे. याप्रकरणी डिचोलीच्या दिवाणी न्यायालयात सुरू असलेल्या मानहानीच्या खटल्यासंदर्भात न्यायालयाने सोमवार (दि.२९) रोजी हा आदेश दिला आहे.

१०० कोटींच्या मानहानीचा खटला

४ डिसेंबर रोजी दिल्ली येथे आयोजित पत्रकार परिषदेत खासदार संजय सिंह यांनी मुख्यमंत्री प्रमोद सावंत यांच्या पत्नी सुलक्षणा सावंत यांचे नाव ‘कॅश फॉर जॉब’ घोटाळ्याशी जोडले होते. या घोटाळ्यात सुलक्षणा सावंत यांचाही हात असल्याचा आरोप संजय सिंह यांनी केला होता.

यानंतर सुलक्षणा सावंत यांनी आपली बदनामी केल्याचा दावा करत संजय सिंह यांच्या विरोधात डिचोलीच्या दिवाणी न्यायालयात १०० कोटी रुपयांची मानहानीची याचिका दाखल केली होती.

न्यायालयाचा कठोर आदेश

या मानहानीच्या खटल्याच्या सुनावणीदरम्यान खासदार संजय सिंह यांनी आपले उत्तर सादर करण्यास न्यायालयाकडून वेळ मागितला होता. त्यानंतर २५ जानेवारी रोजी झालेल्या सुनावणीत न्यायालयाने त्यांना ७ मार्चपर्यंत उत्तर सादर करण्याचे निर्देश दिले होते.

या ताज्या आदेशामुळे संजय सिंह यांच्या अडचणी आणखी वाढल्या आहेत. न्यायालयाने आता त्यांना सुलक्षणा सावंत यांच्या विरोधात कोणतेही वक्तव्य करण्यास मनाई केली आहे.