पणजी : गोवा विधानसभा निवडणुकीचा निकाल अगदी आठवड्याभरात लागणार आहे. त्यामुळे गोव्यात पुन्हा एकदा राजकीय वातावरण चांगलंच तापलं आहे. संख्याबळ कमी पडल्यास त्याची जमवाजमव कशी करायची याची रणनीतीही आतापासूनच बांधण्यास सुरुवात झाली आहे. यातच लहान प्रादेशिक पक्षांना मोठं महत्त्व प्राप्त होणार आहे. गोवा फॉरवर्डची काँग्रेसशी आघाडी असल्याने आता मगोप नेमकं कुणाच्या गोटात सामील होतोय, याची सर्वांनाच उत्सुकता लागलेली आहे. त्यातच आता मगोपच्या सुदिन ढवळीकरांनी भाजपला पाठिंब्यावरुन मोठं विधान केलं आहे. (Sudin Dhavalikar News Updates)

गोव्यात मगोपची तृणमूलशी (TMC) आघाडी आहे. एका वृत्तवाहिनीने सुदिन ढवळीकरांची मुलाखत घेतली. यावेळी त्यांना विचारण्यात आलं की तृणमूलसोबत असताना भाजपला पाठिंबा द्याल का? यावर ढवळीकरांनी गोव्यातील राजकारण वेगळं असल्याचं सांगत पाठिंब्याचे स्पष्ट संकेत दिले आहेत. भाजप आणि तृणमूल एकमेकांचे कट्टर विरोधक पक्ष आहेत. मात्र गोव्यात काहीही होऊ शकतं, कारण गोव्याचं राजकारणच वेगळं असल्याचं सूतोवाच सुदिन ढवळीकरांनी केलं आहे.

दरम्यान काँग्रेसने (Congress) नुकतीच पत्रकार परिषद घेऊन भाजपवर निशाणा साधला. यात भाजपकडून काँग्रेस नेत्यांचे फोन टॅप होत असल्याचा गंभीर आरोपही काँग्रेसकडून करण्यात आला. दरम्यान मगोप आणि गोवा फॉरवर्डला भाजपने लाथ मारुन हाकलल्याचंही मायकल लोबोंनी म्हटलं होतं. तसंच कुठल्याही परिस्थितीत भाजपला (BJP) पाठिंबा मिळणार नाही असा दावाही केला होता. मात्र सुदिन ढवळीकरांच्या नव्या वक्तव्याने अनेकांच्या भुवया उंचावल्या आहेत.