Power Outage Hits Anjuna and Assagao Due to Damaged Main Cable

म्हापसा: हणजूण येथील उपकेंद्राला जोडणारे ३३ केव्ही मुख्य वीज केबल शुक्रवारी (ता.१) पहाटे ३ वाजता नादुरुस्त झाले. त्यामुळे ऐन दिवाळीत आणि लक्ष्मीपूजनादिनीच हणजूण-कायसूव तसेच आसगाव पंचायत कार्यक्षेत्रातील स्थानिकांना खंडित वीजपुरवठ्याचा सामना करावा लागला.

दरम्यान, वीज खात्याने पर्यायी व्यवस्था केली. मात्र, रात्री उशिरापर्यंत हा वीजपुरवठा पूर्ववत झाला नव्हता. शुक्रवारी पहाटे ३ च्या सुमारास अचानक हणजूण वीज केंद्राचा पुरवठा खंडित झाला. या केंद्राला म्हापसा वीज केंद्राद्वारे जोडणी दिलेल्या भूमिगत वीज केबल्समध्ये बिघाड झाला व ही जोडणी खंडित झाली.

वीज केंद्राचा पुरवठा खंडित झाल्यामुळे या केंद्राच्या कार्यक्षेत्रात येणाऱ्या हणजूण, कायसूव, वागातोर, शापोरा, आसगाव व बादे या गावांमध्ये अंधार पसरला. भर दिवाळीच्या सणावेळी तेही लक्ष्मीपूजनाच्या दिवशी वीज गायब झाल्याने लोकांना मनस्ताप सहन करावा लागला. विजेअभावी लोकांची पहाटे झोपमोड झाली.

भूमिगत वीजवाहिनीमध्ये बिघाड झाल्याचा प्रकार समोर येताच पहाटेच वीज अधिकारी व कर्मचाऱ्यांनी हा बिघाड शोधण्याचे काम हाती घेतले. मात्र, बिघाड सापडू शकला नाही. सकाळी फोंडा येथून केबल फायंडिंग मशीन आणल्यानंतर म्हापसा ते हणजूणपर्यंतच्या पट्ट्यात केबलमधील बिघाड शोधण्याचे काम हाती घेण्यात आले. दुपारी ३ वा. हा बिघाड सापडला. हणजूण वीज उपकेंद्राच्या जवळच काही अंतरावर केबल नादुरुस्त झाल्या होत्या.

गुरुवारी रात्री विजेच्या गडगडाटासह कोसळलेल्या पावसामुळे हा बिघाड झाला असावा, अशी शक्यता वीज अधिकाऱ्यांनी व्यक्त केली. केबल बिघाडाचे नेमके ठिकाण सापडल्यावर लगेच वीज कर्मचाऱ्यांनी हे केबल दुरुस्तीचे काम हाती घेतले.

पर्यटनाला बसला फटका

सकाळी जुन्या फिडरच्या माध्यमातून वीज खात्याने विजेची पर्यायी व्यवस्था केली. हणजूण व आसगावमधील फक्त घरगुती वीजग्राहकांना वीजपुरवठा देण्यात आला. मात्र, वीजपुरवठा नसल्याने व्यावसायिक आस्थापनांची विशेषतः हॉटेल, रेस्टॉरन्टवाल्यांची धांदल उडाली. हणजूण व आसगाव पंचायत क्षेत्र हे पर्यटन क्षेत्र असल्यामुळे खंडित वीजपुरवठ्याचा फटका पर्यटनालादेखील झाला.

बिघाड सापडला, दुरुस्ती सुरू

हणजूण उपवीज केंद्राला जोडणाऱ्या भूमिगत वीज केबलमध्ये बिघाड झाला होता. हा बिघाड दुपारी शोधून दुरुस्तीचे काम हाती घेतले आहे. रात्रीपर्यंत दुरुस्तीचे काम पूर्ण होऊन वीजपुरवठा सुरळीत होईल, अशी माहिती वीज खात्याच्या वरिष्ठ अधिकाऱ्यांनी दिली होती. मात्र, रात्री उशिरापर्यंत वीजपुरवठा सुरळीत झाला नव्हता.