Subhash Velingkar Bicholim Police Case Update

डिचोली : सेंट फ्रान्सिस झेवियर यांचा अवमान केल्याप्रकरणी कायद्याच्या कचाट्यात सापडलेल्या सुभाष वेलिंगकरांची शुक्रवारी सलग दुसऱ्या दिवशी चौकशी करण्यात आली. तब्बल तीन तास त्यांची चौकशी करण्यात आली असून चौकशीनंतर त्यांनी माध्यमांना प्रतिक्रिया देखील दिली. मी पोलिसांना चौकशीत सहकार्य करत असल्याचे सांगत वेलिंगकर पोलीस ठाण्याबाहेर निघाले.

सुभाष वेलिंगकर यांनी सेंट झेवियर यांच्या अवशेषांची DNA चाचणी व्हावी, अशी मागणी केल्याने गोव्यात वाद निर्माण झाला. राज्यातील ख्रिस्ती समुदायाच्या भावना दुखावल्या गेल्या आणि त्यांनी राज्यभरात मोर्चे काढले. तर दुसरीकडे वेलिंगकर यांच्या समर्थनार्थ हिंदुत्ववाद्यांनीही मोर्चे काढले. भावना दुखावल्याप्रकरणी वेलिंगकर यांच्याविरोधात डिचोली पोलीस ठाण्यात गुन्हा दाखल करण्यात आला. पोलीस त्यांचा कसून शोध घेत असतानाच वेलिंगकर यांच्यावतीने मुंबई हायकोर्टाच्या गोवा खंडपीठात याचिका दाखल करण्यात आली होती. हायकोर्टाच्या आदेशानुसार शेवटी वेलिंगकर हे गुरुवारी पोलीस ठाण्यात चौकशीसाठी हजर झाले. अवघ्या २० मिनिटांत पहिल्या दिवसाची चौकशी पूर्ण झाली.

शुक्रवारी (११ ऑक्टोबर) सलग दुसऱ्या दिवशी वेलिंगकर चौकशीसाठी डिचोली पोलीस ठाण्यात पोहोचले. चौकशीनंतर पोलीस ठाण्याबाहेर माध्यमांना वेलिंगकर यांनी सांगितले की, "मी आदेशाचे पालन करत पोलिसांना सर्व आवश्यक ती माहिती दिली आहे. एवढंच नाहीतर मी त्यांना पूर्ण सहकार्य करेन अशी ग्वाही देखील दिली आहे".