फोंडा: बोरी येथील जुन्या पुलाच्या खाली झुवारी नदीच्या पात्रात फातोर्डा-मडगाव येथील एका विद्यार्थ्याचा मृतदेह आज (शनिवारी) दुपारी आढळला. माहिती मिळाल्‍यानंतर पोलिसांनी घटनास्‍थळी धाव घेऊन मृतदेह पाण्याबाहेर काढला. मयत विद्यार्थ्याचे नाव आर्यन राजेंद्र बरड (18) असे असून तो मठरस्ता घोगळ-फातोर्डा येथील रहिवासी असल्याचे स्पष्ट झाले.

पोलिसांनी दिलेल्या माहितीनुसार, आर्यन हा बारावीत शिकत होता व पुढच्या आठवड्यात वार्षिक परीक्षा असल्याने तो तणावाखाली होता. आज सकाळी तो घरातून गायब झाल्याचे निदर्शनास येताच बरड कुटुंबीयांची धावपळ उडाली. आर्यनचा सगळीकडे शोध घेण्यात आला, पण तो सापडला नाही. दुपारी त्याचा मृतदेह बोरी येथे पाण्यात तरंगत असल्याचे निदर्शनास आले. प्रथमदर्शनी ही आत्महत्या असल्याचे स्पष्ट झाल्याचे पोलिसांनी सांगितले. पंचनामा करण्‍यात आला असून अधिक तपास सुरू आहे.

मडगावातील बेताळभाटी तळ्यात विद्यार्थ्याचा बुडून मृत्‍यू

बेताळभाटी येथे तळ्यात बुडल्याने एका 14 वर्षीय विद्यार्थ्याचा दुर्दैवी अंत झाला. हा मुलगा काल घरातून बाहेर पडला होता. आज सकाळी त्याचा मृतदेह तळ्यात सापडला. कोलवा पोलिसांनी दिलेल्या माहितीनुसार, मुलगा रात्री उशिरापर्यंत घरी न परतल्याने त्याची शोधाशोध सुरू करण्‍यात आली. तो मुलगा तळ्याकडे कसा पोहोचला याचे गूढ अजून उलगडलेले नाही. या प्रकरणी कोलवाचे पोलिस उपनिरीक्षक अजित वेळीप अधिक तपास करत आहेत.