Fake Dentists In Goa: गोव्याच्या किनारी भागात काम करणाऱ्या तोतया दंतवैद्यांवर कारवाई करण्याचे आश्वासन मुख्यमंत्री डॉ. प्रमोद सावंत यांनी दिले. अशा फसवणूक करणाऱ्या दंत चिकित्सकांविरुद्ध तक्रार करण्यासाठी डेंटल असोसिएशनने पुढे यावे, ज्यामुळे इतर खऱ्या दंतवैद्यांची प्रतिमा खराब होण्यापासून वाचेल, असे मुख्यमंत्री म्हणाले.

18 व्या गोवा स्टेट इंडियन डेंटल असोसिएशनच्या मेळाव्यात मुख्यमंत्री डॉ. प्रमोद सावंत यांनी डेंटल असोसिएशनच्या सदस्यांना पुढे येऊन राज्याच्या किनारी भागात कार्यरत असलेल्या आणि परदेशी पर्यटकांची जास्त रक्कम आकारून फसवणूक करणाऱ्या तोतया दंतवैद्यांच्या विरोधात तक्रार करण्यास प्रोत्साहित केले.

मुख्यमंत्री म्हणाले, किनारी भागात कार्यरत अशा तोतया दंतवैद्यांविरुद्ध काही तक्रारी आपल्याकडे आल्या आहेत ज्यांच्याकडे दंतचिकित्सा करण्याची पात्रता नाही आणि ते निष्पाप परदेशी पर्यटकांची फसवणूक करत आहेत.

डेंटल असोसिएशनने तक्रार करावी

मुख्यमंत्र्यांनी पुढे नमूद केले की, हे फसवणूक करणारे दंतवैद्य बिगर गोमंतकीय आहेत. त्यांच्या फसवणुकीमुळे गोव्यातील खऱ्या दंत चिकित्सकांचे नाव खराब होईल. त्यामुळे डेंटल असोसिएशनने पुढे येऊन अशा फसवणूक करणाऱ्यांविरुद्ध तक्रार करणे आवश्यक आहे.

तक्रार दाखल झाल्यानंतर पोलिस या दंतवैद्यांवर आवश्यक ती कारवाई करतील, असे आश्वासन सावंत यांनी दिले. असल्या दंतवैद्यांवर कठोर कारवाईची गरज असल्याचेही ते पुढे म्हणाले.