सासष्टी: गोव्यातील समुद्रात परप्रांतीय मच्छीमार बेकायदेशीर घुसखोरी करून मासेमारी करत असल्यामुळे गोमंतकीय मच्छीमारांना याचा फटका बसत आहे, असा आरोप गोमंतकीय गोवा प्रदेश काँग्रेसचे युवा नेते ओलांसीयो सीमोईस यांनी येथे घेतलेल्या पत्रकार परिषदेत केली.

मच्छीमाऱ्यांच्या भल्यासाठी सरकार तसेच मत्स्योद्योग विभागाने या घुसखोरीवर रोख लावण्यासाठी त्वरित पावले उचलावी, अशी मागणीही त्यांनी केली. राज्यात गेल्या दोन वर्षांपासून समुद्रात घुसखोरी करून मासेमारी करण्याच्या प्रकारामध्ये वाढ होत चालली असून याचा थेट फटका गोमंतकीय मच्छीमारांना बसत आहे.

काही दिवसांपूर्वी बाणावली समुद्रात परप्रांतीय मच्छीमारांनी अवैधरीत्या घुसखोरी केली असता स्थानिक मासेमाऱ्याच्या सतर्कतेमुळे परप्रांतीय मासेमाऱ्यावर कारवाई करण्यात आली. स्थानिक मासेमारी या घुसखोरांना पकडण्याचे काम करतात तर मत्स्यव्यवसाय विभाग काय करत आहेत, असा सवाल ओलांसीयो सीमोईस यांनी उपस्थित केला. मत्स्योद्योग विभाग स्थानिक की घुसखोर मालपे बॉट मालकांच्या बाजूने आहे, याची चौकशी होणेही गरजेचे आहे, असेही त्यांनी स्पष्ट केले.