फोंडा: गोव्याचे माजी मुख्यमंत्री रवी नाईक यांच्या सन्मानार्थ फोंडा पालिकेने तीन महत्वाचे ठराव मान्य केले आहेत. यापैकी रवी नाईक यांचा पुतळा उभारण्यासंबंधितचा एक महत्वाचा ठराव आहे. पालिकेकडून रवींचा पुतळा उभारला जाणार असल्याची माहिती नगराध्यक्ष आनंद नाईक यांनी दिली आहे.

फोंडा पोलिकेच्या वतीने ३० ऑक्टोबर रोजी रवी नाईक यांना श्रद्धांजली देण्यासाठी विशेष कार्यक्रम आयोजित केला होता. यावेळी झालेल्या बैठकीत तीन महत्वाचे ठराव घेण्यात आले. फोंडा येथे होत असलेल्या रिव्हरफ्रंट प्रकल्पाला “रवी सिताराम नाईक रिव्हरफ्रंट” असे नाव देण्याचा ठराव मंजूर करण्यात आला आहे.

याच प्रकल्पात रवी नाईक यांचा पुतळा देखील उभारला जाणार असल्याची माहिती नगराध्यक्ष आनंद नाईक यांनी दिली.

रिव्हरफ्रंट प्रकल्प पाच कोटी रुपये किंमतीचा असल्याची माहिती यावेळी आनंद नाईक यांनी दिली. तसेच, रवी नाईक यांचे चित्र फोंडा पालिकेची जुनी इमारत आणि नव्या प्रशासकीय इमारतीत लावण्याचा ठराव देखील या बैठकीत घेण्यात आल्याची माहिती आनंद नाईक यांनी यावेळी दिली.

गोव्याचे माजी मुख्यमंत्री तथा विद्यमान कृषिमंत्री रवी सीताराम नाईक (वय ७९) यांचे मंगळवारी (१५ ऑक्टोबर) रात्री ११.३०च्या सुमारास हृदयविकाराच्या तीव्र झटक्याने निधन झाले. 

दरम्यान, रवी नाईक यांच्याच पुढाकारातून फोंडा नगरपालिकेच्या नव्या प्रशासकीय इमारतीचे बांधकाम झाले. त्याचे उद्घाटन मंगळवारी झाले. परंतु प्रकृती अस्वास्थ्यामुळे ते कार्यक्रमाला उपस्थित राहू शकले नव्हते.

सायंकाळनंतर त्यांची तब्येत अचानक खालावली. त्यांना फोंड्यातील सावईकर इस्पितळात दाखल करण्यात आले होते. तेथेच त्यांची प्राणज्योत मालवली.