पणजी: राज्य सरकार दिवाळीनिमित्त वेतन आणि निवृत्तीवेतन २५ ऑक्टोबर रोजी अदा करणार आहे. सणासुदीच्या काळात सरकारी कर्मचाऱ्यांसाठी दिलासादायक बाब ठरली आहे. यासाठी सरकारला निधीची अजिबात चणचण भासणार नाही.
केंद्र सरकारने वस्तू व सेवा करातील राज्याच्या वाट्यापोटी ६८८ कोटी रुपये राज्य सरकारला दिले आहेत. या निधीतून पायाभूत सुविधा विकासाला चालना देणे आणि कल्याणकारी योजनांचा लाभ देणे शक्य होणार असल्याचे मुख्यमंत्री डॉ. प्रमोद सावंत यांनी म्हटले आहे.
राज्य सरकारच्या महसुलापैकी ६८ टक्के रक्कम वेतन आणि सेवानिवृत्ती वेतनावर खर्च होते. दर महिन्याच्या शेवटच्या दिवशी सरकारला यासाठी तजवीज करावी लागते. वेतनास दोन-तीन दिवस उशीर झाला तर ती सरकारसाठी नामुष्कीची बाब ठरते.
कल्याणकारी योजनांचे लाभ दर महिन्याला मिळणे अपेक्षित असतानाही ते तिमाही पद्धतीने दिले जात असल्याच्याही तक्रारी अधूनमधून ऐकण्यास मिळतात. या साऱ्या पार्श्वभूमीवर दिवाळीसाठीचा बोनसही सरकारी कर्मचाऱ्यांना देण्याचा सरकारचा मार्ग वस्तू व सेवा करातील वाटा मिळाल्‍याने मोकळा झाला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.