डिचोली: ‘गोंयच्या सायबा’च्या दर्शनाच्या ओढीने महाराष्ट्रातील वेगवेगळ्या भागातून यंदाही शेकडो भाविक पायीवारी करीत गोव्यात आले आहेत. यापैकी जवळपास दोनशे भाविकांनी सोमवारी रात्री डिचोलीत वास्तव्य केल्यानंतर (मंगळवारी) पहाटे हे भाविक जुने गोवे येथे जाण्यासाठी मार्गस्थ झाले.

दुपारपर्यंत हे भाविक जुने गोव्यात दाखलही झाले. बुधवारी (ता. ३) रोजी गोंयच्या सायबाचे अर्थात सेंट फ्रांसिस झेवियर यांचे फेस्त साजरे होणार आहे. या फेस्तात हे भाविक सहभागी होणार आहेत.

दोडामार्गमार्गे डिचोलीत पोचल्यानंतर या भाविकांनी सोमवारी रात्री शहरातील अवरलेडी सायबिणीच्या चर्च परिसरात मुक्काम केला. या भाविकांमध्ये ख्रिशन बांधवांसह हिंदू बांधवांचाही समावेश आहे.

रात्री या भाविकांनी अवरलेडी सायबिणीच्या चर्चमध्ये प्रार्थनाही केली. गोंयच्या सायबावर श्रद्धा ठेवून पायीवारीला प्रारंभ केल्याचे अनेक भाविकांनी सांगितले. युवकांपासून सत्तरी ओलांडलेल्या भाविकांचाही यामध्ये समावेश आहे. काही भाविकांनी तर सोबत आपल्या तीन ते चार वर्षीय लहान मुलांनाही आणले आहे.

‘पायीवारी’ला इतिहास

सोळाव्या शतकातील संत फ्रान्सिस झेवियर हे सुखी जीवनाचा मार्ग दाखवणारे संत आहेत अशी भाविकांची भावना आहे आणि त्याच भावनेने गोंयच्या सायबाच्या फेस्तानिमित्त महाराष्ट्रातील वेगवेगळ्या भागातील भाविक दरवर्षी पायीवारी करीत जुने गोवे येथे येतात. यंदाही शेकडो भाविक गोव्यात आले आहेत. गेल्या चाळीसहून अधिक वर्षांपासून पायीवारीचा हा उपक्रम सुरू असून आता भाविकांमध्ये वाढ होत आहे, अशी माहिती संताजी लोबो यांनी दिली.

महाराष्ट्रातून पायीवारी

महाराष्ट्रातील आजरा आणि गडहिंग्लज येथील सेंट अँथनी चर्चकडून या पायीवारीला सुरवात झाली होती. भाविक पायीवारी करीत आजरा, नेसरी, भेडशीमार्गे काल सायंकाळी डिचोलीत पोचले. अन्य भागातून आलेले काही भाविक आजरा आणि भेडशी येथे पायीवारीत सहभागी झाले होते. या भाविकांमध्ये महिलांचाही समावेश आहे. सोमवारी सायंकाळी हे भाविक डिचोलीत पोचताच चर्चतर्फे त्यांचे स्वागत करण्यात आले. चर्चतर्फे या भाविकांची चहापान आणि निवाऱ्याची व्यवस्था करण्यात आली होती.