St Estevam Car Plunged Into Cumbarjua River Missing Bashudev Case

पणजी: गेल्या सव्वा महिन्यात जुने गोवे पोलिस बेेपत्ता बाशुदेव भंडारीचे काय झाले, याचे उत्तर देण्यात अपयशी ठरल्याने या प्रकरणाचे तपासकाम त्यांच्याकडून काढून घेऊन गुन्हे शाखेकडे वर्ग करण्याची विनंती वडील नारायण यांनी मुख्यमंत्री डॉ. प्रमोद सावंत यांना केली. तपासकामात राहिलेल्या त्रुटींबाबतही त्यांनी मुख्यमंत्र्यांना अवगत केले. त्यानंतर मुख्यमंत्र्यांनी तपासकाम गुन्हे शाखेकडे वर्ग करण्याचे आश्वासन दिले.

बाशुदेव आणि त्याची मैत्रीण ३१ ऑगस्ट रोजी साखळी येथील एका हॉटेलात जेवल्यानंतर मध्यरात्री पणजीच्या (Panaji) दिशेने निघाले होते. वाटेत समोरून येणाऱ्या कारला त्यांच्या कारची धडक बसली. त्या कारमधील व्यक्तींनी त्यांच्या कारचा पाठलाग सुरू केला. या गडबडीत सांतइस्तेव येथील फेरी धक्क्यावरून युवतीसह कारमध्ये बसलेला बाशुदेव बुडाला. त्यानंतर युवती पाण्याबाहेर आली; परंतु बाशुदेव बेपत्ता झाला आहे.

या प्रकरणाचा पाठपुरावा करण्यासाठी त्याचे वडील नारायण व वडीलबंधू बलराम हे २ सप्टेंबरपासून गोव्यात तळ ठोकून आहेत. पोलिसांनी तपासात अनेक त्रुटी ठेवल्या. बाशुदेव पाण्यात बुडाला, असे गृहित धरूनच तपास केला. प्रत्यक्षात पोहता येणारा आणि कारमधील युवतीला वाचविणारा बाशुदेव बुडूच शकत नाही, ही शक्यता पोलिसांनी गृहित धरली नाही.

पाठलाग करणारे दोघेजण, जेवणावेळी उपस्थित असलेले दोन विद्यार्थी आणि बाशुदेवच्या कारमधील युवती यांना पोलिसांनी कधी संशयित म्हणून पाहिलेच नाही. त्यांची केवळ चौकशी करून त्यांना सोडून दिले. बाशुदेव २७ ऑगस्ट रोजी गोव्यात आला होता. त्याचदिवशी त्याचा मित्र कल्पराज आपल्या मैत्रिणीसह गोव्यात आला होता. त्याच्याकडूनही अधिक माहिती काढून घेण्यात पोलिसांना यश आलेले नाही, असे नारायण यांना वाटते.

बाशुदेव भंडारी बेपत्ता प्रकरण आता गुन्हे शाखेकडे वर्ग करण्याच्या हालचाली सुरू आहेत. बाशुदेवचे वडील नारायण यांनी मुख्यमंत्री डॉ. प्रमोद सावंत यांची साखळी येथील निवासस्थानी भेट घेऊन ही मागणी केल्यावर मुख्यमंत्र्यांनी ही मागणी मान्य केली. उद्या तसा आदेश पोलिस महासंचालकांकडून जारी केला जाऊ शकतो.