Goa Congress

गोव्यातील अनुसुचित जमातीला वनहक्क कायद्यातील दावे निकाली काढण्यासोबतच राजकीय आरक्षण देण्याचे आश्वासन काँग्रेसने शनिवारी दिले. केंद्रात सरकार स्थापन केल्यानंतर या समुदायाला न्याय देणार असल्याचे काँग्रेसने म्हटले आहे.

गोव्याचे मुख्यमंत्री होण्याची संधी एसटी समाजाच्या नेत्यांना मिळायला हवी, असे काँग्रेसचे गोवा प्रभारी माणिकराव ठाकरे म्हणाले.

काँग्रेस हाऊसमध्ये झालेल्या पत्रकार परिषदेत बोलताना भाजपने केवळ राजकीय फायद्यासाठी अनुसूचित जमात समाजाचा वापर केल्याचा आरोप ठाकरे यांनी केला.

यावेळी गोवा प्रदेश काँग्रेस समितीचे अध्यक्ष अमित पाटकर, काँग्रेस एसटी विभागाचे अध्यक्ष रामकृष्ण जल्मी, जीपीसीसी सरचिटणीस आणि एसटी नेते जोसेफ वाझ आदी उपस्थित होते.

भाजपचा अजेंडा एसटीविरोधी आहे. भाजपने राजकीय फायद्यासाठी एसटी समाजाचा वापर केला, परंतु त्यांची राजकीय आरक्षण व इतर मागण्या कधीच पूर्ण केल्या नाही. आम्ही या समस्यांना प्राधान्य देऊ आणि त्या सोडवू, असे आश्वासन माणिकराव ठाकरे यांनी दिले.

केंद्रात आणि गोव्यात सरकार आल्यानंतर एसटी समाजाचे प्रश्न सोडवू. अर्थसंकल्पात तरतूद केलेला निधी त्यांच्या कल्याणासाठी वापरला जातो हे आम्ही पाहू, असेही ठाकरे म्हणाले.

एसटीला राजकीय आरक्षण देण्यात भाजप अपयशी ठरल्याचा आरोप अमित पाटकर यांनी केला. काँग्रेसचे सरकार आल्यावर अनुसूचित जमातीचे क्षेत्र अधिसूचित केले जाईल, असे आश्वासन त्यांनी दिले.

वन हक्क कायद्यासाठी राष्ट्रीय मिशन स्थापन करू. सर्व प्रलंबित एफआरए दाव्यांचे निपटारा एका वर्षात केले जाईल आणि नाकारलेले दावे सहा महिन्यांत निकाली काढले जातील, असे पाटकर म्हणाले. गोव्यात 9500 प्रकरणे प्रलंबित आहेत, असे ते म्हणाले.