Cape News : केपे, राज्य सरकारने दिव्यांग मुलांच्या सांगोपनासाठी खास हॉस्टेल उभारण्याचा संकल्प केला असून कोणत्याही सेवाभावी संस्थेने पुढाकार घेऊन पूर्ण या हॉस्टेलची जबाबदारी घेतल्यास सरकार अनुदान देण्यास तयार आहे, असे मुख्यमंत्री प्रमोद सावंत यांनी सांगितले.

कुडचडे येथे दिव्यांग विद्यार्थ्यांसाठी संजय स्कूलच्या नवीन इमारतीची पायाभरणी केल्यानंतर ते बोलत होते.

कुडचडेचे आमदार नीलेश काब्राल, नगराध्यक्ष प्रदीप नाईक, सरपंच कविता गावस देसाई, जिल्हा पंचायत सदस्य सिद्धार्थ गावस देसाई, संजय स्कूलचे अध्यक्ष सिद्धार्थ कुंकळयेकर, शिक्षण खात्याचे सचिव प्रसाद लोलयेकर व इतर मान्यवर उपस्थित होते.

कुडचडे मतदारसंघात राज्यात अद्याप दिव्यांग मुलांसाठी कुठेही उभारली गेली नाही, अशी सुसज्ज अशी वास्तू उभारण्यात येणार असल्याने आपल्याला आनंद होत आहे, असे मुख्यमंत्री सावंत यांनी सांगितले.

राज्यात अनेक ठिकाणी अनेक शिक्षण संस्था मोठ मोठ्या इमारती उभारतात पण दिव्यांगासाठी सुसज्ज अशी शाळा नसल्याने त्यांच्या पालकांचीही चिंता वाढली होती. पण ही उणीव आमच्या सरकारने दूर करण्याचा प्रयत्न केला आहे, असे त्यांनी सांगितले.

या विद्यार्थ्यांना बाजारात जाऊन खरेदी कशी करतात हे प्रशिक्षण देण्यासाठी या शाळेत व्यवस्था केली आहे. तसेच इतर व्होकेशनल कोर्सही येथे घेण्यात येणार असल्याचे त्यांनी सांगितले. पंतप्रधान नरेंद्र मोदी हे दिव्यांग मुलांसाठी अनेक योजना राबवत असून त्याचे जास्त लक्ष या मुलांवर आहे, असे त्यांनी सांगितले.

कुडचडेत बरीच कामे रखडली असून मुख्यमंत्री प्रमोद सावंत यांनी ती येत्या तीन वर्षात पूर्ण करून द्यावीत, अशी मागणी काब्राल यांनी यावेळी केली. संजय स्कूलची इमारत तयार व्हावी म्हणून आम्ही बरेच प्रयत्न केले.

कारण गेल्या काही वर्षात बऱ्याच ठिकाणी या शाळेचे स्थलांतर करावे लागल्याने पालकांना व मुलांनाही त्रास होत होता. पण आता सुमारे पंधरा कोटी खर्चून बांधण्यात येणाऱ्या या शाळेमुळे सर्व प्रश्न मार्गी लागणार असल्याचे काब्राल यांनी सांगितले. सदर शाळेत २८ क्लास रूम असून साधारण ४०० विद्यार्थी क्षमता असल्याचे काब्राल यांनी सांगितले.