Goa Special Child School: आजपासून गोव्यातील पहिली ते बारावीचे वर्ग ऑफलाईन पद्धतीने सुरू झाले आहेत. पालकांमध्ये संभ्रम निर्माण झाला असला तरी सरकारच्या निर्णयाला पालकांनी सहमती दर्शवून आपल्या पाल्यांना शाळेत पाठवले आहे. तब्बल 2 वर्षांनंतर शाळा विद्यार्थ्यांनी गजबजल्या आहेत.

याचबरोबर गोव्यातील बौद्धिक अक्षम मुलांच्या शाळादेखील आज दोन वर्षांनंतर भरल्या आहेत. यासंदर्भात संजय स्कूलचे चेअरमन गुरुप्रसाद पावसकर यांनी खाजगी मीडियाशी संपर्क साधला असता, त्यांनी अत्यंत भावनिक मत व्यक्त केले. त्यावेळी ते म्हणाले की, पर्वरी संजय स्कूलच्या 'स्पेशल चाईल्ड' शाळेत जवळपास 500 विद्यार्थी आहेत. याशिवाय संपूर्ण गोव्यामध्ये इतर शाखांमध्ये मिळून 1000 च्या आसपास विद्यार्थी शिकत आहेत. पण मागील दोन वर्षांपासून आम्ही आमच्या विद्यार्थ्यांना भेटू शकलो नव्हतो. यादरम्यान शाळेतर्फे ऑनलाईन वर्ग (Online Class) आयोजित केले होते. पण बऱ्याच ठिकाणी नेटवर्कच्या तक्रारीमुळे ऑनलाईन वर्ग घेणे शक्य होत नव्हते. पण आज दोन वर्षानंतर विद्यार्थ्यांना शाळेत येताना बघून आम्ही खूप भारावून गेलो आहोत.

बौद्धिक कार्यक्षमता कमी असलेल्या मुलांना मुळातच जास्त आधाराची आणि शिकवणीची गरज असते.अशा वेळी दूर राहून ऑनलाईन शिक्षणातून या विद्यार्थ्यांना आम्हाला म्हणावे इतके लक्ष देता येणे कठीण होते. पालकांनाही या सर्व गोष्टी सांभाळताना तारेवरची कसरत होत होती. त्यामुळे आम्हीही अत्यंत विचारात पडलो होतो.आता शाळा सुरू झाल्यामुळे आम्ही या विद्यार्थ्यांना पूर्णवेळ देऊ शकू आणि त्यांना लागणारे शिक्षण आणि सहाय्यता देण्यास आता आम्ही सक्षम आहोत.

शाळेत आज या विद्यार्थ्यांच्या स्वागतासाठी शाळेने सर्व वर्गांमध्ये सजावट केली होती. अत्यंत भावनिक रीतीने शाळेने विद्यार्थ्यांचे स्वागत केले.