Rain Update: राज्यात पेडणे, सत्तरी आणि तिसवाडी तालुक्यांमध्ये काही ठिकाणी शुक्रवारी रात्री ढगांच्या प्रचंड गडगडाटासह जोरदार अवकाळी पाऊस पडला. सुमारे एक तास जोरदार पावसाने झोडपले. पेडण्यात रात्री पावसाचा जोर कमी झाला असला, तरी ढगांच्या गडगडाटासह पहाटे तीन वाजेपर्यंत पावसाची रिपरिप सुरू होती.

पाऊस सुरू झाल्यामुळे वीजही गायब झाली. पाऊस बंद झाल्यावर वीजपुरवठा सुरळीत झाला. शुक्रवारपासून तुळशी विवाह सुरू झाले असले, तरी अनेक ठिकाणी ते व्हायचे आहेत. तुळशी विवाहानिमित्त रंगरंगोटी केलेली तुळशीवृंदावने लोकांनी प्लास्टिकने झाकून ठेवली. मात्र, आच्छादन न घातलेल्या तुळशी वृंदावनांची रंगरंगोटी खराब झाली.

तिसवाडी तालुक्यात सांताक्रुझ, ताळगाव भागात शुक्रवारी पहाटे पाऊस पडला. साकोर्डा भागात शनिवारी दुपारी हलक्या सरींनी हजेरी लावली. मात्र, संध्याकाळी 3.45 च्या सुमारास पुन्हा जोरदार अवकाळी पावसाच्या सरी बरसल्याने वातावरणात गारवा पसरला. त्यामुळे उष्म्याने हैराण झालेल्यांना काहीसा दिलासा मिळाला. अर्ध्या तासानंतर परिसरात वादळी वारे सुटले आणि ढग गडगडू लागले. पुन्हा या परिसराला अवकाळी पावसाने झोडपले.