Goa News: किनाऱ्यांवरील वाढत्या बेकायदेशीर कृत्यांवर आळा घालण्यासाठी गोवा सरकार युद्धपातळीवर काम करत आहे. यासाठी सरकारने 'गोवा बीच व्हिजिल ॲपही लॉन्च' केले. आतापर्यंत या ॲपवर 1852 तक्रारींची नोंद झाली आहे. या ॲपवर समुद्रकिनाऱ्यांवरील कचऱ्याचे ढीग साचल्याच्या सर्वाधिक 593 तक्रारी प्राप्त झाल्या आहेत. तर मिरामार आणि करंझाळे समुद्रकिनाऱ्याबाबत प्रत्येकी 222 तक्रारी नोंदवण्यात आल्या आहेत.

दरम्यान, समुद्रकिनाऱ्यांवरील बेकायदेशीर कृत्यांना आळा घालण्यासाठी पर्यटन विभागाने 25 जानेवारी गोवा बीच व्हिजील ॲप लॉन्च केले होते. गोवा इलेक्ट्रॉनिक्स लिमिटेडने विकसित केलेल्या या ॲपवर गोमंतकीयांना समुद्रकिनाऱ्यावर घडणाऱ्या बेकायदेशीर गोष्टींचे फोटो काढून अपलोड करण्याची सुविधा आहे. जशी तक्रारी प्राप्त होते तसे पर्यटन विभाग त्याची दखल घेऊन तात्काळ कारवाई करतो.

दुसरीकडे, पर्यटन विभागाने ॲप लॉन्च केल्यापासून आतापर्यंत 1852 तक्रारी प्राप्त झाल्या असून 1030 तक्रारींचे निराकरण करण्यात आले आहे. उत्तर गोव्यातील 17 समुद्रकिनाऱ्यांवरुन तक्रारी तर दक्षिण गोव्यातील (South Goa) 22 तक्रारी नोंदवण्यात आल्या आहेत. राज्यातील 37 समुद्रकिनाऱ्यांवर 19 प्रकारच्या तक्रारी नोंदवण्यात आल्या. यामध्ये सर्वाधिक 593 तक्रारी कचऱ्याचे ढिग साचल्याच्या तर 410 तक्रारी कचरा आणि घाण टाकल्याच्या होत्या.