पणजी : उत्तर गोव्यातील आसगाव येथे उभारलेल्या सिली सोल्स बार ॲण्ड रेस्टॉरन्ट विरोधात जमिनीत भराव टाकून जमीन तयार केल्याची लेखी तक्रार नगर नियोजन खात्याकडे आणि संबंधित मंत्र्यांकडे दिली असल्याची माहिती तक्रारदार ॲड. आयरीश रॉड्रिगीज यांनी दिली आहे.

खोट्या कागदपत्रांच्या आधारे मिळवलेल्या परवान्यावर अबकारी खात्यात तक्रार केली होती. यावर बजावलेल्या कारणे दाखवा नोटीसवर आज (शुक्रवारी) सुनावणी झाली. याबाबत संबंधित मालकांना त्यांचे लिखित मत देण्याची सूचना अबकारी आयुक्त नारायण गाड यांनी केली आहे. याबाबतची पुढील सुनावणी 22 ऑगस्टला ठेवली आहे.

ॲड. आयरिश रॉड्रिगीज म्हणाले, आसगाव येथे उभारण्यात आलेल्या सिली सोल्स हे हॉटेल केंद्रीय महिला आणि बालकल्याण खात्याच्या मंत्री स्मृती इराणी यांच्या संबंधितांचे आहे. या हॉटेलला दिलेला बार परवाना हा हॉटेल परवाना मिळण्यापूर्वी देण्यात आला होता. ही गंभीर चूक आहे याशिवाय जो दाखला देण्यात आला होता, तो मृत व्यक्तीच्या नावे दिला होता. यासंबंधी अबकारी खात्याकडे ॲड. रॉड्रिगीस यांनी तक्रार केली होती. या तक्रारीला मूळ मालक स्व. ॲंथोनी डिगामा यांचा मुलगा डिन डिगामा याला कारणे दाखवा नोटीस बजावली होती. यावर अबकारी आयुक्तांसमोर सुनावणी झाली.

आयुक्तांनी संबंधितांना त्यांचे लिखित मत मांडण्याची सूचना केली असून, पंचायत निवडणुका असल्याने आणि कर्मचारी वर्ग या निवडणुकांमध्ये व्यस्त असल्‍याने या प्रकरणाची पुढील सुनावणी 22 ऑगस्टला ठेवली आहे. दुसरीकडे हे हॉटेल उभारणी करताना बेकायदेशीररित्या जमिनीत भराव टाकून जमीन बनविण्यात आली आहे. हे नगरनियोजन कायद्याच्या विविध कलमांचे उल्लंघन आहे. या संबंधीची लेखी तक्रार खात्याकडे आणि नगरनियोजन मंत्री विश्वजीत राणे यांना दिली आहे.

‘सिली सोल्स’ या हॉटेल विरोधात खोट्या कागदपत्रांच्या आधारे बार परवाना मिळवल्याबद्दल अबकारी खात्यात तक्रार नोंदवण्यात आली आहे. हॉटेल उभारताना पंचायतींचा कोणताच परवाना घेतलेला नाही. त्यामुळे हे हॉटेल बेकायदा आहे. यामुळे या विरोधात पंचायत संचालकांकडे तक्रार केली आहे. तर नगरनियोजन खात्याच्या विविध कलमांचे उल्लंघन झाल्यामुळे या खात्यातही तक्रार केली असल्याची माहिती ॲड. रॉड्रिगीस यांनी दिली.