प्रसिद्ध गायक आणि संगीतकार शंकर महादेवन सध्या गोव्यात आहेत. आपल्या गोवा दौऱ्यात शंकर महादेवन यांनी गोव्यात सुरु असलेल्या पर्पल फेस्टिव्हलला भेट दिली. यावेळी दिव्यांग मुलांसोबत वेळ घालवत त्यांनी मुलांच्या कलागुणांचं कौतुकही केलं. यावेळी शंकर महादेवन यांनी विशेष मुलांसोबत गाण्यावर ठेका धरला. याचा व्हिडीओ शंकर महादेवन यांनी इन्स्टाग्रामवर शेअर केला आहे.

पर्पल फेस्टिव्हलमध्ये काल विशेष मुलांचं नृत्य सादरीकरण सुरु होतं. या या मया या या कोकणी गाण्यावर विशेष मुलांचं नृत्य सुरु होतं. मात्र मुलांचं नृत्य पाहून शंकर महादेवन स्वत:ला रोखू शकले नाहीत. त्यांनीही या विशेष मुलांच्या तालात ताल मिळवत गाण्यावर ठेका धरला. विशेष म्हणजे महादेवन यांनी यावेळी या विशेष मुलांना सॅल्युट करण्यासाठी खास पर्पल म्हणजेच जांभळ्या रंगाचं जॅकेटही परिधान केलं होतं.

दरम्यान देशातला पहिला विविधतेचा तसेच सर्वसमावेशकतेचा सोहळा म्हणून उत्सुकता लागलेल्या पर्पल फेस्टला मान्यवरांच्या उपस्थितीत उत्साही वातावरणात कालपासून सुरुवात झाली. आयनॉक्स परिसरात झालेल्या उद्‌घाटन सोहळ्यास गोवा राज्याचे मुख्यमंत्री डॉ. प्रमोद सावंत, केंद्रीय सामाजिक न्याय आणि सक्षमीकरण मंत्री डॉ. वीरेंद्र कुमार यांची प्रमुख उपस्थिती होती. या सोहळ्याला प्रसिद्ध गायक, संगीतकार शंकर महादेवन यांनीही उपस्थिती लावली होती.

पर्पल फेस्ट सोहळ्यादरम्यान शंकर महादेवन यांनी आपले विचार मांडले. महादेवन म्हणाले,  संगीतप्रेमी विद्यार्थ्यांसाठी गोव्यात संगीत शिकण्यासाठी योग्य सुविधा नाहीत, भारतीय आणि आंतरराष्ट्रीय विद्यार्थी येऊन संगीत शिकू शकतील अशा सुविधा असणं हे महत्वाचं आहे. अशा दर्जेदार सुविधा असणं फार गरजेचं आहे.