डिचोली: ‘मोगरी’ विक्रेत्यांपासून ते हॉटेल, मिठाई व्यावसायिकांचे लक्ष आणि उत्सुकता लागून राहिलेली शिरगाव येथील श्री लईराई देवीची जत्रा चार दिवसांवर आल्याने सर्वत्र मंगल आणि भक्तिमय वातावरण पसरले आहे. सर्वत्र जत्रेच्या तयारीला वेग आला आहे.

शिरगावात स्टॉल थाटणे आदी तयारी अंतिम टप्प्यात आली असून, गावोगावी धोंड तळावर धोंड भक्तगणांच्या सोवळ्या व्रतास सुरुवात झाली आहे. संपूर्ण गोमंतकासह देश-विदेशात प्रसिद्धीस पावलेली आणि लाखो भक्तगणांचे श्रद्धास्थान असलेली श्री लईराई देवीची जत्रा येत्या शुक्रवारी (ता.२ मे) परंपरेप्रमाणे साजरी होणार आहे.

तर दुसऱ्या दिवशी शनिवारपासून मंगळवारपर्यंत कौलोत्सव साजरा करण्यात येणार आहे. दरम्यान, ‘होमकुंड’ हे शिरगावच्या जत्रेचे वैशिष्ट्य. ‘एक मोठे अग्निदिव्य’ अशी या ‘होमकुंडा’ची ख्याती आहे. जत्रा चार दिवसांवर आल्याने आता ‘होमकुंड’ रचण्याचे काम सुरू झाले आहे.

दरम्यान, खाणबंदीनंतर आणि वाढत्या महागाईचा या जत्रेच्या आर्थिक उलाढालीवर कोणताही परिणाम झाल्याचे जाणवत नाही. उलट दरवर्षी आर्थिक उलाढाल वाढत असते. सध्याच्या घडीस या जत्राकाळात होणारी आर्थिक उलाढाल एक कोटीच्या घरात पोहोचत आहे, अशी माहिती काही महाजनांकडून मिळाली.

लईराई देवीला ‘मोगरी’ची फुले प्रिय, अशी भक्तगणांची भावना आहे. त्यामुळे शिरगावात येणारा प्रत्येक भाविक देवीला मोगरीची फुले अर्पण करतात. जत्राकाळात शिरगावात ‘मोगरी’च्या फूल विक्रीतून जवळपास २० लाख रुपयांची आर्थिक उलाढाल होत असते, असा अंदाज आहे. वेगवेगळ्या भागातून मिळून जवळपास ५०० फूलविक्रेते ‘मोगरी’ची फुले विकण्यासाठी शिरगावात तळ ठोकतात.

स्टॉल थाटण्याचे काम जोरात

श्री लईराई देवीच्या जत्रेनिमित्त देवीच्या मंदिरापर्यंत शेकडो दुकानांची फेरी भरत असते. त्यात खाजे, खेळणी, रेडिमेड कपडे, हॉटेल्स आदी मिळून वेगवेगळ्या साहित्याची दुकाने असतात. दरवर्षीप्रमाणे पावणी करून दुकानांसाठी जागा वाटप करण्यात आले असून, दुकानदारांनी स्टॉल थाटण्यास सुरुवात केली आहे. सध्या स्टॉल थाटण्याचे काम जोरात सुरू आहे. जत्रा सुरळीतपणे साजरी व्हावी यासाठी देवस्थान समिती कामाला लागली आहे, अशी माहिती देवस्थानचे अध्यक्ष दीनानाथ गावकर आणि अन्य पदाधिकाऱ्यांनी दिली आहे.

धोंड भक्तगणांची तयारी

जत्रेनिमित्त गावोगावी धोंड भक्तगण तयारीला लागले असून, धोंड तळही सज्ज झाले आहेत. गावोगावी असलेले देवीचे धोंड जत्रेपूर्वी किमान पाच दिवस कडक आणि सोवळे व्रत पाळतात. हे धोंड भक्तगण नदीकाठी किंवा धार्मिक स्थळी धोंड तळावर एकत्रितपणे वास्तव्य करून व्रत पाळतात.

सोमवारपासून धोंड भक्तगणांच्या कडक व्रताला प्रारंभ झाला आहे. नवीन धोंड भक्तगण पाच दिवस, तर जुने धोंड भक्तगण तीन दिवस कडक व्रत पाळतात. सध्या धोंड तळावर प्रसन्न वातावरण असून, श्री लईराई देवीचा जयघोष कानी पडत आहे. जत्रेच्या आदल्या रात्री गुरुवारी प्रत्येक ‘धोंड’ तळावर ‘व्हडले’ जेवण होणार आहे.