Mapusa Crime News: म्हापसा येथे एका शिक्षकानेच विद्यार्थिनीचा विनयभंग केल्याचा प्रकार उघडकीस आला आहे. संबंधित शिक्षकाला पोलिसांनी अटक केली असून त्याच्याविरोधात पॉस्को तसेच बाल कायद्यांअंतर्गत गुन्हा नोंद करण्यात आला आहे. हा शिक्षक उच्च माध्यमिक शाळेत अध्यापनाचे काम करतो.

म्हापसाचे एसडीपीओ जीवबा दळवी यांनी दिलेल्या माहितीनुसार, उत्तर गोव्यातील संबंधित शाळेच्या व्यवस्थापनानेच या शिक्षकाबाबत पोलिसांत तक्रार दिली आहे. संबंधित शिक्षक विद्यार्थिनींकडे सतत पाहत असल्याच्या तक्रारी शाळा व्यवस्थापनाकडे आल्या होत्या.

संबंधित शिक्षकाने विद्यार्थिनींकडे त्यांचा मोबाईल फोन नंबरही मागितला होता. तसेच हा शिक्षक विद्यार्थिनींना चुकीच्या पद्धतीने स्पर्श करत असल्याच्याही तक्रारी विद्यार्थिनींनी केल्या होत्या. सातत्याने अशा पद्धतीचे वर्तन पाहून अनेकांनी शाळा व्यवस्थापनाकडे तक्रारी केल्या होत्या.

काही विद्यार्थिनींनी घडलेले प्रकार त्यांच्या पालकांच्या कानावर घातले होते. या सर्व तक्रारींची दखल घेत शाळा व्यवस्थापनाने संबंधित शिक्षकाविरोधात पोलिसात तक्रार दिली आहे. त्यानुसार पोलिसांनी या शिक्षकाविरोधात पॉस्को या कायद्यासह बाल कायद्यांतर्गत गुन्हा नोंद केला आहे.