Shivaji Maharaj Statue vandalism At Karaswada-Acoi Mapusa Goa: करासवाडा-म्हापसा येथील आयडीसीच्या (थिवी औद्योगिक वसाहत) मुख्य गेटसमोरील रस्त्यालगत असलेल्या छत्रपती शिवाजी महाराजांच्या पुतळ्याची अज्ञात समाजकंटकांनी विटंबना केल्याची घटना सोमवारी सकाळी उघडकीस आली.

शिवप्रेमींनी संयम बाळगून तसेच एकतेचे प्रतीक दाखवत सायंकाळी सिंहासनाधिष्ठीत नवीन पुतळ्याची प्रतिष्ठापना केली. या प्रकरणी रात्री उशिरा पोलिसांनी तिघा संशयितांना ताब्‍यात घेतले.

त्‍यानंतर मात्र संतप्त बनलेल्‍या जमावाने शिवपुतळ्याजवळील संशयिताच्या दुकानाची मोडतोड केली व म्हापसा पोलिस स्थानकाबाहेर गर्दी केली.

पुतळ्याची विटबंना झालेल्या चौथऱ्यावर सायंकाळी नवीन शिवपुतळ्याची प्रतिष्ठापना करताना लोकप्रतिनिधींच्या समर्पित वृत्तीचे अनोखे दर्शन घडले.

ख्रिस्‍तीधर्मीय आमदार कार्लुस फेरेरा यांनी शिवरायांच्‍या पुतळ्याला पुष्‍पहार अर्पण करून दुग्‍धाभिषेकही केला. हा विरळा प्रसंग धार्मिक एकोप्‍याचा संदेश देऊन गेला. त्‍यांच्‍यासह मंत्री सुभाष फळदेसाई, माजी केंद्रीय मंत्री ॲड. रमाकांत खलप, आमदार प्रेमेंद्र शेट यांनीही दुग्‍धाभिषेक केला.

दिवसभर घटनास्थळी सुरक्षा व्यवस्था तैनात केली होती. तसेच आयडीसीच्या गेटसमोर मोठ्या संख्येने शिवप्रेमी व हिंदू संघटनांच्‍या पदाधिकाऱ्यांनी गर्दी केली होती.

नवा पुतळा स्‍थापन; आमदार फेरेरांसह अन्‍य लोकप्रतिनिधींकडून दुग्‍धाभिषेक

या प्रकरणी तपासकामासाठी पोलिस महासंचालकांनी आज संध्याकाळी आदेश जारी करून विशेष तपास पथकाची नियुक्ती केली. उत्तर गोवा पोलिस अधीक्षकांना तपासकामाचा आढावा घेण्याचे व मार्गदर्शन करण्याचे निर्देशही दिले आहेत.

या प्रकरणाची सखोल चौकशी करून गुन्‍हेगारांचा शोध घेण्‍याचे आदेशात नमूद करण्यात आले आहे. या घटनेमुळे शिवप्रेमींच्या भावना दुखावल्याने सरकारने त्याची गंभीर दखल घेत हे कृत्य करणाऱ्यांना गजाआड करण्याच्या सूचना पोलिस यंत्रणेला दिल्या आहेत.

या घटनेमुळे धार्मिक सलोखा राखण्याचे पोलिसांसमाेर मोठे आव्हान निर्माण झाले आहे. गोव्याच्या एकतेला बाधा पोहचू नये याची काळजी घ्यावी लागेल.

"छत्रपती शिवाजी महाराजांच्या पुतळ्याची विटंबना करणे म्हणजे, गोव्यातील शांतता व धार्मिक एकता बिघडवण्याचा प्रयत्न आहे. अशा प्रकारांना थारा दिला जाणार नाही. दोषींवर कडक कारवाई करण्‍यात येईल."

- डॉ. प्रमोद सावंत, मुख्यमंत्री

"छत्रपती शिवाजी महाराज हे माझे लहानपणापासून आदर्श आहेत. सर्वांनी राष्ट्रपुरुषांचा मानसन्मान केला पाहिजे. शिवपुतळ्याची विटंबना ही निंदनीय गोष्‍ट आहे. लोकांनी आज एकतेचे दर्शन घडविले."

- अ‍ॅड. कार्लुस फेरेरा, हळदोणेचे आमदार