मांद्रेचे आमदार जीत आरोलकर आणि उदरगत संस्था मांद्रे, यांच्या संयुक्त विद्यमाने मांद्रेत भव्य शिगमोत्सव चित्ररथ मिरवणूक मंगळवार दि.21 रोजी निघणार आहे,अशी माहिती आमदार जीत आरोलकर यांनी पत्रकार परिषदेत दिली.

तब्बल चार दिवस विविध कार्यक्रम आयोजित केले आहेत. यासाठी अखिल गोवा पातळीवरील चित्ररथ स्पर्धेसाठी एक लाखाचे बक्षीस, शिवाय रोमटामेळ स्पर्धेसाठी रु. 80 हजार, लोक नृत्यसाठी रु.३० हजार, वेशभूषा स्पर्धेसाठी रु.२० हजार , तर पेडणे तालुका मर्यादित स्पर्धेसाठी रु. १० हजार, अशी बक्षिसे आहेत.

शिवाय ‘इथे ओशाळला मृत्यू’ नाटक आयोजित केले आहेे. मंगळवार दि. २१ रोजी ५ वा.श्री भगवती सप्तेश्वर मंदिर प्रांगणातून चित्ररथ, रोमटामेळ ,लोक नृत्य मिरवणूक होईल.

मांद्रे पंचायत सभागृहात आयोजित पत्रकार परिषदेत मांद्रे महोत्सव समितीचे अध्यक्ष मुकेश सावंत, उपाध्यक्ष सरपंच अमित सावंत, प्रवीण वायंगणकर , नरेंद्र शेटगावकर , लक्ष्मीकांत गवंडी, सचिव दयानंद मांद्रेकर सचिव सागर तिळवे ,खजिनदार प्रदीप हडफडकर, पंच किरण सावंत आदी उपस्थित होते.

सांगितीक कार्यक्रमांची रेलचेल

१९ रोजी सायंकाळी ७ वा. ग्रामपंचायत पटांगणावर ‘क्षितिज स्वरांचे’ गायक सन्मिता धापडे शिंदे, मुंबई आणि चैतन्य कुलकर्णी यांचा सहभाग असेेल. २० मार्च रोजी ७ वा. गायक स्वप्निल बांदोडकर यांचा कार्यक्रम, त्यात संपदा माने आणि समृद्ध चोडणकर हे सहगायक सहभागी होणार आहेत.