मडगाव: मडगाव पोलिस स्‍थानकावर राईटर विभागात हवालदार म्‍हणून काम करणारे शंकर नारायण सावंत हे सोमवार, २९ जुलैपासून बेपत्ता असून मडगाव पोलिस स्‍थानकावरील आपली ड्युटी संपवून ते डिचाेली येथे आपल्‍या घरी जात असताना ही घटना घडली आहे. यासंदर्भात सावंत यांच्‍या पत्‍नीने डिचाेली पाेलिस स्‍थानकावर पती बेपत्ता असल्‍याची तक्रार नोंदवली आहे. एक पोलिसच बेपत्ता झाल्‍याने या प्रकरणातील गूढ वाढले आहे.

सावंत हे सर्वण-डिचोली येथे राहणारे असून आपली पाेलिस स्‍थानकावरील ड्युटी संपवून ते आपल्‍या घरी जात हाेते. डिचाेली पोलिस स्‍थानकाचे निरीक्षक दिनेश गडेकर यांच्‍याशी संपर्क साधला असता, सावंत यांना काल सोमवारी दुपारी ३ ते ४ वा. यादरम्‍यान सर्वण-डिचोली परिसरात लोकांनी शेवटचे पाहिले होते. त्‍यांच्‍या दुचाकीत एक चिठ्ठी सापडली असून आपण घर सोडून जात असल्‍याचे त्‍यात त्‍यांनी लिहिल्याची माहिती दिली.

बदलीसाठी सुरू होते प्रयत्न

सावंत यांची एका वर्षापूर्वी मडगाव पोलिस स्‍थानकात बदली केली हाेती. दरराेज डिचाेलीतून ते मडगावात जात असत. मडगाव कार्यालयात आपल्‍यावर कामाचा ताण येतो, असे त्‍यांनी यापूर्वी आपल्‍या मित्रांना सांगितले होते. त्‍यामुळे आपली मडगावहून बदली व्‍हावी यासाठी त्‍यांचे प्रयत्‍न सुरू हाेते. याच तणावातून त्‍यांनी घर साेडून जाण्‍याचा निर्णय घेतला असावा, अशी शक्‍यता व्‍यक्‍त केली जात आहे. सध्‍या डिचाेली पाेलिस त्‍याचा शोध घेत आहेत.