पर्वरी: बिठ्ठोण येथील अल्पवयीन युवतीचे (Underage girl) अपहरण करून तिच्यावर लैंगिक अत्याचार (Goa Crime) प्रकरणी अटक केलेल्या संशयित जावेद शेख उर्फ कबीर याला आज म्हापसा न्यायदंडाधिकाऱ्यासमोर हजर केले असता त्याला दहा दिवसांची पोलीस कोठडी सुनविण्यात आली आहे. जावेद शेख याने युवतीवर अत्याचार करण्यासाठी वापरलेली चार चाकी (Car) पोलिसांनी जप्त केली आहे.

जावेद शेख याची बायको दोन वर्षांपूर्वीच त्याला सोडून गेली आहे. सध्या हाळीवाडा बिठ्ठोण येथे तो एकटाच राहतो. तसेच पिडीत युवतीच्या वडिलाचे एका वर्षापूर्वी मृत्यू झाला होता. सध्या आई आणि एक भाऊ असे तिघेजण राहतात. पिडीत युवती आणि त्याची आई पुंडलिक नगर येथील एका सदनिकेत घरकाम करण्यासाठी गेले असता. तेथील तिसऱ्या मजल्यावरून आत्महत्या करण्याच्या उद्देशाने खाली उडी मारली. त्यात तिचे दोन्ही पाय मोडले आहेत. संशयीत आरोपीने पिडीत युवतीला जबरदस्तीने आपल्या कारमध्ये कोंबले व तिचे अपहरण केले. तिला वेरे येथे नेवून तिच्यावर गाडीतच लैंगिक अत्याचार केला. पिडीत मुलगी संशयिताच्या शेजारी राहत असल्याने संशयिताने ओळखीचा फायदा घेऊन तिच्यावर लैंगिक अत्याचार केला आहे. या घटनेचा पर्वरी परिसरात तीव्र प्रतिक्रिया उमटल्या आहेत.

युवती टोकाची भूमिका का घेते

या घटनेनंतर एखादी युवती तीन मजल्यावरून खाली उडी मारून जीवन संपविण्याचा प्रयत्न करते यावरून सर्व स्पष्ट होत आहे. एखादी युवती इतकी टोकाची भूमिका का घेते ? याचाही विचार होणे गरजेचे आहे. पोलिसांनी या प्रकरणाच्या मुळापर्यंत जावून संशयित आरोपीला कठोर शिक्षा केली पाहिजे. सद्या पर्वरीत दिवशेंदिवस गुन्हे वाढत आहेत. गुन्हेगारांना राजकीय वरदहस्त आहे का? याचीही चौकशी होणे गरजेचे आहे, असे उत्तर गोवा भाजप अध्यक्ष महानंद अस्नोडकर यांनी सांगितले.