Pune Police Arrest Murderer From Goa

पुणे: सोळा वर्षांपूर्वी सांगवी येथे खून करुन फरार झालेल्या आरोपीला गोव्यातून अटक करण्यात आली आहे. सुरक्षा रक्षक म्हणून काम करत असेलल्या आरोपीने किरकोळ कारणावरून एका व्यक्तीचा खून केला. त्यानंतर तो ठिकठिकाणी वास्तव्य बदलून राहू लागला. अखेर १६ वर्षानंतर पिंपरी-चिंचवड गुन्हे शाखेने त्याला गोव्यातून अटक केलीय.

सुनील अशोकराव कांगणे (वय ३९, रा. आगशी, गोवा. मूळ रा. नांदेड) असे अटक केलेल्या आरोपीचे नाव आहे. त्याने सन २००९ मध्ये सुभाष सोपं धाकतोंडे (वय ५५, रा. रहाटणी) याचा खून केला होता. आगशी पोलिसांनी आरोपीला ताब्यात घेऊन, सांगवी पोलिसांच्या स्वाधीन केले.

पोलीस उपयुक्त संदीप डोईफोडे यांनी दिलेल्या माहितीनुसार, सन २००९ मध्ये सुनील कांगणे हा सांगवी परिसरात सुरक्षा रक्षक म्हणून काम करत होता. सुभाष धाकतोंडे यांनी त्याचा ड्युटीचा पॉईंट बदलला. या कारणावरून सुनील याने सुभाष यांचा धारदार शस्त्राने वार करत खून केला. खून केल्यानंतर तो पळून गेला.

सुनील हा मूळचा नांदेड जिल्ह्यातील मुखेड तालुक्यातील आहे. खून केल्यानंतर तो त्याच्या मूळ गावी न जाता वेगवेगळ्या राज्यात जाऊन आपले अस्तित्व लपवून राहू लागला. मात्र पिंपरी-चिंचवड गुन्हे शाखेचे पोलीस त्याच्या मागावर होते.

गुन्हे शाखा युनिट एक चे पोलीस अंमलदार प्रमोद गर्जे यांना माहिती मिळाली कि, सुनील कांगणे हा गोव्यात राहत आहे. त्यानुसार पोलिसांचे एक पथक गोव्याला रवाना झाले. पोलिसांनी गोव्यातून सुनील याला अटक केली.

ही कारवाई पोलीस आयुक्त विनयकुमार चौबे, सह पोलीस आयुक्त शशिकांत महावरकर, अपर पोलीस आयुक्त वसंत परदेशी, पोलीस उपायुक्त संदीप डोईफोडे यांच्या मार्गदर्शनाखाली पोलीस निरीक्षक सुहास आव्हाड, श्रेणी पोलीस उपनिरीक्षक शिवाजी कानडे, पोलीस अंमलदार सोमनाथ बोऱ्हाडे, महादेव जावळे, गणेश महाडिक, सचिन मोरे, प्रमोद गर्जे यांनी केली.