Vasco School Ceiling Collpased: दक्षिण गोव्यातील वास्को येथील एका शाळेच्या छताचा भाग शनिवारी अचानक कोसळला. अचानक घडलेल्या या प्रकाराने विद्यार्थ्यांसह शिक्षकांमध्ये घबराट निर्माण झाली.

या घटनेनंतर शाळा प्रशासनाने शाळेतील सर्व वर्ग सोडण्याचा निर्णय घेत, सर्व विद्यार्थ्यांना घरी पाठवून शाळा रिकामी केली. सुदैवाने या दुर्घटनेत कुणीही जखमी झालेले नाही.

गेल्या काही दिवसांपासून गोव्यात मुसळधार पाऊस सुरू आहे. त्यातूनही ही घटना घडली असण्याची शक्यता आहे. ही शाळा सरकारी असून जुनी आहे. तिचे बांधकाम थोडे कमकुवत झाल्याची शक्यता आहे.

भविष्यात ही इमारत कोसळू नये म्हणून या इमारतीची आत्ताच दुरूस्ती करणे गरजेचे आहे. या घटनेनंतर परिसरातील पालकांनाही मुलांना या शाळेत पाठवण्याची भीती वाटत आहे. त्यामुळे तातडीने याबाबत शाळा प्रशासनाने निर्णय घ्यावा, अशी मागणी होत आहे.