Goa Rain :

सावईवेरे, मुसळधार पाऊस आणि वादळी वाऱ्यामुळे शनिवारी रात्री कावंगाळ-सावईवेरे येथील संदेश नाईक यांच्या घराच्या मागील बाजूस असलेल्या झाडाची भली मोठी फांदी तुटून घरावर पडल्याने मोठे नुकसान झाले.

ही घटना काल मध्यरात्री एकच्या सुमारास घडली. ही फांदी घराच्या मागील भागावर पडल्याने सुदैवाने घरातील लोक बचावले. रविवारी सकाळी अग्निशामक दलाच्या जवानांनी घटनास्थळी येऊन ही फांदी हटविली. स्थानिक नागरिकांनीही या कामात सहकार्य केले.

यावेळी संदेश नाईक यांनी सांगितले की, २०१९ साली घराबाहेर असलेल्या शौचालयावर भला मोठा दगड पडल्याने शौचालयाला भेगा पडून नुकसान झाले होते. त्यावेळी त्यांनी वेरे-वाघुर्मे ग्रामपंचायतीला पत्रव्यवहार करून त्यांच्या घराच्या मागील बाजूच्या झाडांच्या फांद्या घरावर पडण्याची शक्यता असल्याने त्या कापाव्यात अशी निवेदनाद्वारे मागणी केली होती. परंतु या निवेदनाची कोणतीच दखल घेतली नसल्याने ही दूर्घटना घडल्याचे त्यांनी सांगितले. या झाडाच्या फांद्या कापल्या असत्या तर ही दुर्घटना घडली नसती असे संदेश नाईक म्हणाले.

फांदी घरावर पडल्याने घरातील काही साहित्याची नासधूस झाली आहे. सरकारी यंत्रणेने तसेच स्थानिक आमदार तथा कला संस्कृती मंत्र्यांनी या प्रकरणाची दखल घेऊन नुकसान भरपाई द्यावी, अशी मागणी त्यांनी केली.