वाळपई: सत्तरी तालुक्यातील सावर्डे गावात गेल्या आठ दिवसांपासून नळ कोरडे असल्‍याने ग्रामस्‍थ संतप्त बनले आहेत. ऐन दिवाळी सणाच्‍या काळात पाण्याविना हाल होत असल्यामुळे ग्रामस्थांनी सोमवारी वाळपई पाणीपुरवठा विभागावर धडक दिली. तसेच तातडीने पाणीपुरवठा सुरू न केल्यास मोर्चा काढण्याचा इशारा दिला.

पाण्याच्या समस्येने त्रस्त झालेल्या सावर्डेवासीयांना आता नव्या संकटाला सामोरे जावे लागत आहे. काही वाड्यांवर मुबलक पाणी येत असले तरी अनेक भागांत नळ पूर्णपणे कोरडे पडले आहेत, अशी नागरिकांची तक्रार आहे.

ग्रामस्‍थ बोंबी बाळू सावंत यांनी सांगितले की, गेल्या तीन महिन्यांपूर्वी आम्हाला गढूळ पाण्याची समस्या सतावत होती. ती निकाली निघाल्यानंतर आता गेल्‍या आठ दिवसांपासून नळाद्वारे थेंबभरही पाणी आलेले नाही. ऐन दिवाळीत पाण्याविना दिवस काढावे लागत आहेत व ही अत्यंत वेदनादायक बाब आहे.

गावात नदी आणि झरा असला तरी तो सुमारे एक किलोमीटर अंतरावरआहे. उंच भागातील घरांपर्यंत नळाचे पाणी पोहोचत नाही. पाणी सोडणाऱ्या ऑपरेटरकडे विचारणा केली असता, तो दररोज वेगवेगळी कारणे देतो. महिलांनी सांगितले की, घरात स्वयंपाक, धुणीभांडी आणि पिण्याच्या पाण्यासाठी रोजचा त्रास सुरू आहे. काही घरांना दोन तासांसाठीच पाणी मिळते, तेही कमी दाबाने. एवढ्या वर्षात इतका त्रास कधी झाला नव्हता.

उंच भागात पोहोचत नाही पाणी

हरिजनवाडा, मळवाडा आणि पंचायतवाडा मिळून सुमारे ३०० नागरिकांना पाण्यासाठी प्रचंड त्रास सहन करावा लागत आहे. काल रविवारी टॅंकर पाठवण्यात आला, मात्र उंच भागातील घरांपर्यंत ते पाणी पोहोचले नाही. असा टॅंकर पाठवून काय उपयोग, नळाला नियमित पाणी येईपर्यंत आम्ही गप्प बसणार नाही, असा इशारा नागरिकांनी दिला.