Sanjeev Verekar : लढवय्ये कवी अशी प्रतिमा असलेले साहित्य अकादमी पुरस्कार विजेते कवी आणि पत्रकार संजीव वेरेकर (64) यांचे शुक्रवारी रात्री 8.30च्या सुमारास निधन झाले. प्रकृती अस्वास्थ्‍यामुळे त्यांना चार दिवसांपूर्वी गोवा वैद्यकीय महाविद्यालय इस्पितळात दाखल केले होते. उपचार सुरू असतानाच त्यांची प्राणज्‍योत मालवली.

संजीव यांच्‍या पश्‍‍चात पत्नी सरिता, दोन कन्‍या असा परिवार आहे. शनिवारी सावईवेरे येथील स्मशानभूमीत त्‍यांच्‍यावर अंत्यविधी होतील. संजीव यांच्‍यावर महिन्याभरापूर्वी वास्को येथील एका खासगी इस्पितळात पोटाची शस्त्रक्रिया करण्‍यात आली होती. त्यातूनच त्यांची प्रकृती पुन्हा खालावली.

मूळ सावईवेरे-फोंडा येथील वेरेकर कोकणी राजभाषा आंदोलनातही सक्रिय होते. अन्यायाविरोधात लढणारे कवी, अशी त्‍यांची ओळख होती. त्यांच्या ‘रक्तचंदन’ या कविता संग्रहाला 2021चा साहित्य अकादमी पुरस्कार प्राप्त झाला होता. ‘अस्वस्थ सूर्य’ या कविता संग्रहाला विमला पै पुरस्कार मिळाला होता.

‘सांज सुलुस’ या कविता संग्रहाला डॉ. टी. एम. पै प्रतिष्ठान पुरस्कार, ''वास्तू पुरुषाचो अंत जातना'' या संग्रहाला आकाशवाणी पुरस्कार तर ''भावझुंबर'' आणि ''मुंबर'' या संग्रहांना कोकणी भाषा मंडळ साहित्य पुरस्कार लाभला होता.