CM Pramod Sawant Birthday : पर्वरी येथील संजय स्कूलमधील विशेष मुलांनी मुख्यमंत्री डॉ. प्रमोद सावंत यांच्या 50व्या वाढदिनानिमित्त 50 फुलांचा पुष्पगुच्छ तयार केला आहे. हा पुष्पगुच्छ सोमवारी मुख्यमंत्र्यांच्या वाढदिनी त्यांना दिला जाईल, अशी माहिती भाजप प्रवक्ते सिद्धार्थ कुंकळ्येकर यांनी दिली.

कुंकळ्येकर यांनी मुले बनवित असलेल्या फुलांची छायाचित्रे सोशल मीडियावर प्रसिद्ध केली आहेत.

दृष्टिकोनात सकारात्मक बदल

विशेष मुलांसाठी नुकताच राज्यात पर्पल फेस्ट पार पडला होता. मुख्यमंत्री सावंत यांच्या मार्गदर्शनाखाली आणि समाजकल्याण मंत्री सुभाष फळदेसाई यांच्या पुढाकारामुळे तो फेस्ट विशेष चर्चेत राहिला.

यशस्वीरित्या झालेल्या या फेस्टमुळे आता केंद्र सरकारही त्यात आपला वाटा उचलीत आंतरराष्ट्रीय स्तरावर हा फेस्ट करण्याच्या तयारीत आहे. त्यामुळे राज्यात विशेष मुलांकडे पाहण्याचा दृष्टिकोन बदलत असल्याचे दिसून आले आहे.

विशेष बाब संजय स्कूलमधील विशेष मुले ही विविध स्तरावर आपला ठसा उमटवत आली आहेत, त्यामुळे राज्य सरकार या मुलांच्या सतत पाठीशी राहिले आहे.