गोव्यात गुन्हेगारीचे प्रमाण वाढते आहे की काय ? अशी शंका निर्माण व्हावी अशा पद्धतीने राज्यात फसवणुकीच्या घटना घडत आहेत. आज सांगोल्डा येथील आजारी मुलीच्या उपचाराच्या बहाण्याने तिच्या वडीलांना अज्ञाताने तब्बल 22 लाख रुपयांना गंडा घातल्याचा धक्कादायक प्रकार समोर आला आहे.

(Sangolda resident Rs 22 lakhs on pretext of helping with financial aid for treatment of ailing daughte)

मिळालेल्या माहितीनुसार सांगोल्डा येथील रहिवासी असणारी एक मुलगी किडनीच्या आजाराने त्रस्त आहे. या मुलीच्या वडिलांना मुलीचे उपचार सरकारी योजनेतून करून देतो, असे आश्वासन देत अज्ञात व्यक्तीने त्यांच्याकडून सुमारे 22 लाख रुपये उकळले असल्याचा धक्कादायक प्रकार समोर आला आहे.

गोवा पोलिसांनी याबद्दल अज्ञात व्यक्तीविरोधात गुन्हा दाखल केला असून या प्रकरणाचा तपास सुरू असल्याची ही माहिती पोलिसांनी दिली आहे. मात्र एखाद्या आजारी व्यक्तीला ही फसवल्याच्या प्रकाराने सांगोल्डा परिसरात नागरिकांत एकच चर्चा सुरु आहे.

याबाबत काही स्थानिकांनी म्हटले आहे की, यापुर्वी गोव्यात फसवणूक मर्यादीत होती. आता मात्र हे प्रमाण वाढले असून प्रशासनाने यावर उपाययोजना कराव्यात. तसेच गुन्हेगाराला कठोरातील कठोर शिक्षा देण्यात यावी, अशी मागणी स्थानिकांनी केली आहे.