फोंडा: सरकारी नोकरी देण्याचे आमिष दाखवून सामान्य लोकांना लुबाडण्याचे अनेक प्रकार सध्या समोर येत आहेत. यात दिवसेंदिवस नवीन नावं जोडली जातायत. सोमवारी (दि. ११ नोव्हेंबर) रोजी समोर आलेल्या माहितीनुसार काही दिवसांपूर्वी दीपश्री विरुद्ध पोलिसांजवळ तक्रार नोंदवलेला संदीप परब हा स्वतः जॉब स्कॅममध्ये सामील असल्याने पोलिसांनी त्याला अटक केली आहे.

खांडोळा पोलिसांनी एका माणसाच्या तक्रारीवरून संदीप जगन्नाथ परब याला अटक केली आहे. संदीपने तक्रार नोंदवणाऱ्या माणसाला नोकरी देण्याचे आमिष दाखवत तब्बल ५ लाख रुपयांचा गंडा घातल्याचं त्याने तक्रारीत नोंदवलं आहे.

विशाल गावकर (वय, ३३ खांडोळा) असे तक्रारदाराचे नाव असून त्याला संदीप परब याने एलडीसी पदाच्या नोकरभरती बाबत माहिती दिली होती व यासाठी एकूण १४ लाख रुपये द्यावे लागतील असेही सांगितले होते.

ठरल्याप्रमणे विशाल गावकरने संदीपला ५ लाख रुपये दिले, मात्र काही काळ उलटल्यानंतर नोकरी किंवा पैसे परत न मिळाल्याने विशालने संदीप विरोधात तक्रार नोंदवली. विशाल गावकरची फसवणूक केल्याप्रकरणी पोलिसांनी सध्या संदीपला ताब्यात घेतले आहे. संदीपने ही सर्व रक्कम दीपश्रीच्या ताब्यात दिल्याची माहिती देखील मिळते, कारण संदीप हा दीपश्रीचा मध्यस्थ म्हणून काम करत होता.

म्हार्दोळ पोलिसांकडे नोंदवल्या गेलेल्या तक्रारीनुसार दीपश्रीने ४४ जणांना विविध सरकारी खात्यांत नोकरी देण्याचं आश्वासन देत सर्वाधिक २० लाख, तर कमीतकमी ३ लाख रुपये घेतले आहेत. मात्र दीपश्री विरोधात तक्रार नोंदवणारा देखील संदीप असल्याने अजून एक प्रश्नचिन्ह कायम आहे.