Goa Sand Mining: कामुर्ली पंचायत क्षेत्रातील भरवणवाडा व अन्य भागात अवैधरित्या रात्रीच्या वेळी रेती उपसा सुरूच असून या बेकायदेशीर प्रकारात ज्या व्यक्तींचा सहभाग आहे त्यांच्याविरुद्ध संबंधित खात्याने कारवाई न केल्यास या वाड्यावरील नागरिक त्यांना रोखण्याचा प्रयत्न करतील व त्याची संपूर्ण जबाबदारी शासनाची राहील, असा इशारा दिला आहे.

गेले अनेक दिवस सुमारे २० यांत्रिक व अन्य होड्या या रेती उपसा प्रकरणात गुंतल्या आहेत. रात्री १२ ते पहाटे ५ पर्यंत हा व्यवसाय चालत आहे. या बेकायदा रेती उपसा प्रकरणात जे गुंतले आहेत, त्यांना रोखण्याचे काम संबंधित खात्याने केले पाहिजे. या रेती उपशामुळे नदीच्या काठावर असलेल्या घरांना धोका निर्माण झाला असून संबंधित खात्याच्या अधिकाऱ्यांकडून कारवाईची मागणी स्थानिक नागरिक करीत आहेत. या प्रकरणी स्थानिक आमदार तसेच अधिकाऱ्यांनी आवश्यक पावले उचलून स्थानिक ग्रामस्थाना न्याय द्यावा, अशी मागणी होत आहे.

कायदा हाती घेण्याची तयारी

या बेकायदेशीर रेती उपशाचा धोका भरवणवाडा, हाउसिंग बोर्ड, सातेरीवाडा, तीन माड भागातील रहिवाशांना होणार असून बंदर कप्तान खात्याने तसेच उपजिल्हाधिकारी कार्यालयाने संबंधित रेती उपसा करणाऱ्यांना अटकाव न केल्यास स्थानिक नागरिक कायदा हाती घेण्याच्या तयारीत आहेत. तसे झाल्यास त्याला प्रशासन जबाबदार राहील, असे स्थानिकांनी सांगितले.

कामुर्लीत जनक्षोभ कायम

कामुर्ली भागात डोंगर माळरानावरील कोमुनिदाद जमिनीत बेकायदेशीर, विनापरवाना बंगले व प्लॉटस केले असून त्यासाठी ग्रामसभेत मोठा गहजब झाला. स्थानिकांनी संबंधितांना अटकाव केला. मात्र, शासन पातळीवर कोणतेही प्रयत्न होत नाहीत. त्यामुळे स्थानिकांत संताप व्यक्त होत असून हा प्रकार न रोखल्यास तीव्र क्षनक्षोभास प्रशासनाला सामोरे जावे लागेल, असा इशारा स्थानिकांनी दिला आहे.