म्हापसा: येथील २२ वर्षीय विद्यार्थी सॅम्युअल ब्रागांझा यांच्या संशयास्पद मृत्यू प्रकरणाच्या चौकशीला महत्त्वाचे वळण मिळाले आहे. या प्रकरणाची चौकशी करणारे विशेष पोलिस अधीक्षक विश्वेश कर्पे यांनी आपला गोपनीय अहवाल उत्तर गोवा पोलिस अधीक्षकांकडे सादर केल्याची माहिती विश्वसनीय सूत्रांकडून मिळाली आहे.

सूत्रांच्या माहितीनुसार, या अहवालात म्हापसा पोलिस ठाण्यातील चौकशीचा घटनाक्रम, घटनेच्या दिवशीची स्थिती तसेच पोलिसांच्या भूमिकेबाबतचे निष्कर्ष नमूद करण्यात आले आहेत. त्यामुळे या अहवालानंतर पुढे कोणती प्रशासकीय अथवा शिस्तभंगाची कारवाई केली जाते, याकडे सर्वांचे लक्ष लागले आहे.

म्हापसा येथील गावसावाडो परिसरातील रहिवासी आणि महाविद्यालयीन विद्यार्थी असलेल्या सॅम्युअल ब्रागांझा याचा रस्त्यावर कचरा टाकत असल्याचा व्हिडिओ सोशल मीडियावर व्हायरल झाला होता. या व्हिडिओची दखल घेत म्हापसा पोलिसांनी त्याच्याविरोधात गुन्हा दाखल केला होता. त्यानंतर सोशल मीडियावरील ट्रोलिंग आणि पोलिसांच्या कारवाईच्या कथित भीतीमुळे तो मानसिक तणावाखाली गेला होता.

डोक्यावर, डोळ्याजवळ गंभीर जखमा

शवविच्छेदन अहवाल समोर आल्यानंतर या प्रकरणाने नवे वळण घेतले. अहवालात सॅम्युअलच्या डोक्यावर व डोळ्याजवळ गंभीर जखमा असल्याचे नमूद करण्यात आले असून, त्यांपैकी काही जखमा मृत्यूपूर्वी २४ तासांच्या आत झालेल्या असल्याचे स्पष्ट करण्यात आले आहे.