काही दिवसांपूर्वी साळगाव येथे एका घरात 2.90 लाखांचे दागिने चोरी झाल्याची घटना उघडकीस आली होती. या प्रकरणी पोलिसांनी एका महिलेला अटक केली असून संशयित महिलेविरूध्द भादंसंच्या 380 कलमान्वये गुन्हा नोंद केला. संशयिताला न्यायालयाने चार दिवसांची पोलीस कोठडी सुनावली.
याबाबत अधिक माहिती अशी की, फिर्यादींच्या घरी संशयित महिला आली होती. यावेळी संशयित महिलेने 3 ते 4 एप्रिल दरम्यान फिर्यादीच्या घरातील कपाटातील मंगळसूत्र, दोन लॉकेट असलेली सोनसाखळी, दोन जोड्या कर्णफुले, पाटली, 5 बांगड्या, नथ व दोन अंगट्या मिळून 2 लाख 90 हजार रूपये किंमतीचे दागिने चोरी केले.
घरात चोरी झाल्याचे फिर्यादीच्या लक्षात येताच साळगाव पोलिसांत तक्रार केली. फिर्यादींनी याप्रकरणी संशयित महिलेवर संशय व्यक्त केला होता.
पोलिसांनी संशयित महिलेचा शोध घेत ताब्यात घेतले. प्राजक्ता खावनेकर (कुडाळ, सिंधुदूर्ग) असे अटक करण्यात आलेल्या संशयित महिलेचे नाव आहे. पोलिसांनी संशयिताकडून चोरीची 37 ग्रॅमचे सोन्याचे मंगळसूत्र हस्तगत केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.