Valpoi Gauri Pujan: सत्तरी तालुक्यातील गावागावांत आज पारंपरिक गौऱी पूजनाचा कार्यक्रम मोठ्या उत्साहात साजरा करण्यात आला. ग्रामीण भागात हा उत्सव चतुर्थीच्या पाचव्या दिवशी साजरा केला जातो, तर काही गावांत मुहुर्तावर हा उत्सव साजरा करण्यात येतो.

यंदा मुहुर्तानुसार गौरी पूजन सहाव्या दिवशी आले आहे. त्यामुळे काही भागांत सोमवारी हा उत्सव (Festival) साजरा करण्यात येणार आहे. वेळूस, कोपार्डे, म्हाऊस, वेळगे, झर्मे, दाबे, सावर्शे, मासोर्डे, नगरगाव, दाबोस यासह इतर गावांत हा साजरा करण्यात आला.

कसे करतात गौरी पूजन?

* प्रातःकाळी सुवासिनी विहिरीवर किंवा नदीवर जाऊन कळसात गौरी पूजनासाठी पाणी घेऊन येतात. नंतर त्याची विधिवत पूजा केली जाते.

* देवीसमोर ओवशे तयार केले जातात. हळदीच्या पानावर पदार्थ भरून त्याची पूजा केली जाते.

* ओवशे मंदिरात, घरातील देव्हाऱ्यात ठेवून, घरातील प्रमुखाला देऊन झाल्यानंतर सुवासिनी प्रत्येक घरात जाऊन ओवशे वाटतात.

* सुवासिनी घरातील गणेशाचे तसेच घरातील ज्येष्ठांचे आशीर्वाद घेतात. नंतर घरी येऊन महाप्रसाद करतात.

* संध्याकाळी गौरीचे पाणी ज्या ठिकाणाहून आणले, तिथे विसर्जित केल्या जातात.